AQSH oziq-ovqat bozorlarining barqarorligini oshirish uchun Afrikaga qo‘shimcha 2,5 milliard dollar yuboradi. Bunday qaror AQSH prezidenti Jo Bayden tomonidan qabul qilindi, deb xabar bermoqda Oq uy matbuot xizmati. Vashington va Afrika Ittifoqi, shuningdek, oziq-ovqat xavfsizligi bo‘yicha strategik hamkorlikni yo‘lga qo‘yishga kelishib oldi.
Bunday kelishuvlarga Vashingtonda Afrikaning 49 davlati ishtirok etgan AQSH—Afrika sammiti yakunlarida erishilgan. Qo‘shma Shtatlar va Afrika Ittifoqi o‘rtasidagi strategik sheriklik “qisqa muddatda oziq-ovqat va o‘g‘itlarga shoshilinch va o‘tkir ehtiyojlarni qondirish uchun davlat va xususiy sektorni” jalb qilish rejalashtirilgan.
“Biz 2023-yil fevral oyida o‘tkaziladigan Afrika Ittifoqi sammitiga qadar uzoq muddatli maqsadlarga erishish uchun harakat rejasini ishlab chiqishni maqsad qilganmiz”, — deyiladi qo‘shma bayonotda.
AQSH—Afrika sammiti sakkiz yil ichida birinchi marta o‘tkazildi. The Washington Post yozganidek, tadbir maqsadlaridan biri — Afrika mamlakatlariga Rossiya va Xitoy bilan hamkorlik qilishdan ko‘ra, AQSH bilan hamkorlik foydaliroq ekanini ko‘rsatish. Amerikaliklar bu ikki davlatning Afrikadagi rolini beqarorlik deb ataydi.
BMT, shuningdek, Ukrainada urush boshlanganidan keyin eng qashshoq mamlakatlarda ocharchilik xavfidan ogohlantirdi. Tashkilot ma’lumotlariga ko‘ra, joriy yilda Ukrainadagi mojaro tufayli yana 13 millionga yaqin odam to‘yib ovqatlanmaslik muammosiga duch kelmoqda.
Mavzuga doir: Jazoir prezidenti mamlakat BRIKSga qo‘shilishga tayyorligini ma’lum qildi
Izoh (0)