Koronavirus kasallangan bemorlar tanasida hatto ularning o‘limidan keyin ham saqlanishi mumkin, shu bilan birga, virusning yuqish qobiliyati ham saqlanib qoladi. Bu haqda The New York Times Yaponiyadagi Tiba universiteti va Germaniyadagi Gamburg-Eppendorf tibbiyot markazi tadqiqotiga tayanib ma’lum qildi.
Germaniyalik mutaxassislar ma’lumotlariga ko‘ra, COVID-19 izlari o‘limdan keyin jasadlarda 17 kun davomida saqlanib qolgan. O‘z navbatida, yaponiyalik olimlar hatto o‘lik odam tanasida ham yuqumli virus ahamiyatli miqdorda saqlanishini aniqladi. Ular og‘maxonlar ustida ham tadqiqot o‘tkazdi: tirik jonivorlar bilan bitta qafas ichida bo‘lgan o‘lik og‘maxon o‘z turdoshlariga koronavirus yuqtirgan.
“Xuddi zombilar haqidagi dahshatli filmdagi kabi, koronavirus kasallangan bemorlarning vafotidan keyin ham ularning tanasida saqlanishi mumkin”, — deyiladi maqolada.
Ayni vaqtda yaponiyalik olimlar qayd etishicha, tirik bemordan koronavirus yuqishi xavfi jasadlardan zararlanish xavfidan ancha yuqori.
Koronavirus — odamlar va hayvonlarga yuqadigan viruslarning keng oilasi. Ularning o‘ziga xos jihati oqsilli tikanlar bo‘lib, ular tufayli viruslar tezkor va samarali tarzda tarqalishga qodir. Ularning ba’zilari odamlarda oddiy shamollashdan tortib, jiddiyroq holatlargacha bo‘lgan respirator infeksiyalarini keltirib chiqarishi mumkin. Yangi COVID-19 koronavirus infeksiyasi birinchi marta 2019-yil dekabrida Xitoyning Uxan shahrida avj olgandi. 2020-yil martida, virus butun sayyoraga tarqalganidan keyin, Jahon sog‘liqni saqlash tashkiloti pandemiya avj olganini e’lon qildi.
Izoh (0)