AQSH Rossiyaning “Ukrainaga qanaqa mudofaa ko‘magini taqdim etish haqida buyruq berishiga” yo‘l qo‘ymaydi, dedi Pentagon matbuot kotibi Patrik Rayder.
Shu tariqa, u Rossiya elchixonasining Kiyevga Amerikaning Patriot zenit-raketa majmualari yuborilgan taqdirda, “oldindan aytib bo‘lmaydigan oqibatlar” bo‘lishi haqidagi bayonotiga munosabat bildirdi.
Rayder Ukrainaga zenit-raketa majmuasi berilishi mumkinligi haqidagi ma’lumotni izohlab o‘tirmadi. “AQSH Rossiya bilan urush holatida emas. Bizga ziddiyat kerak emas, biz Ukrainaga mudofaa ko‘magini taqdim etishga e’tiborimizni qaratganmiz”, — dedi u matbuot anjumanida.
CNN ma’lumotlariga ko‘ra, AQSH prezidenti Jo Bayden ma’muriyati Ukrainaga Patriot zenit-raketa majmualarini yuborishga tayyorgarlik jarayonini yakunlamoqda, ushbu majmua jo‘natilishi haqida shu hafta e’lon qilinishi mumkin.
Patriot zenit-raketa majmuasi yuborilishini Pentagon rahbari Lloyd Ostin ma’qullashi kerak, shundan keyin esa qaror Bayden tomonidan tasdiqlanadi.
“Albatta, Patriot komplekslari Rossiya qurolli kuchlarining qonuniy nishoniga aylanadi. Lekin hozir bunga izoh bermagan bo‘lardim, sababi zenit-raketa majmualarini Ukrainaga yetkazib berilishi haqidagi xabarlar OAV da tarqalmoqda. Bu narsa ishonchsiz, shuning uchun rasmiy ma’lumotni kutamiz”, — degan edi Kreml matbuot kotibi Dmitriy Peskov bu xabarga javoban.
Izoh (0)