Jazoir prezidenti mamlakat BRIKSga qo‘shilishga tayyorligini ma’lum qildi

Jazoir BRIKS blokiga qo‘shilishga qiziqish bildirmoqda, bu haqda respublika prezidenti Abdulmajid Tebbun ma’lum qildi, deb yozadi “RBK”.

“Jazoirda BRIKSga qo‘shilish uchun deyarli barcha sharoitlar bor va u ushbu alyansga qo‘shilishga kuchli qiziqish bildirmoqda”, — dedi u.

Uning so‘zlariga ko‘ra, BRIKSga qo‘shilish Jazoirga “qo‘sh qutbli nizolar”dan uzoqda bo‘lish imkoniyatini beradi.

Rossiya prezidenti yordamchisi Yuriy Ushakov Moskva BRIKSning ehtimoliy kengayishiga ijobiy qarashini, ammo “bu muammoga juda ehtiyotkorlik bilan, puxtalik bilan yondashish kerak”ligini aytdi. Rossiya tomoni qo‘shilish uchun nozmzodlarga jarayonlar va talablarni belgilashni taklif etmoqda, dedi u. Ushakovning fikricha, birinchi shunday formatlar topish kerakki, ular boshlang‘ich bosqichda birlashma bilan kuzatuvchilar sifatida hamkorlik qilish imkonini bersin.

BRIKS 2006-yil iyunida Peterburg iqtisodiy forumi doirasida Braziliya, Rossiya, Hindiston, Xitoy iqtisodiyot vazirlari ishtirokida tashkil topgan. 2010-yilda unga Janubiy Afrika Respublikasi qo‘shilgan.

Iyun oxirida Eron va Argentina BRIKSga qo‘shilish uchun ariza bergan edi. O‘shanda Rossiya TIV rasmiy vakili Mariya Zaxarova: “Oq uydagilar dunyoda yana nimani o‘chirib qo‘yish, taqiqlash va buzish haqida o‘ylayotgan paytda, Argentina va Eron BRIKSga a’zo bo‘lish uchun arizalar topshirdi”, — degan edi.

Shuningdek, iyul o‘rtalarida Turkiya, Misr va Saudiya Arabistoni BRIKS davlatlari guruhiga kirish uchun tayyorlanayotgani ma’lum bo‘lgandi.