АҚШ президенти маъмурияти бошқарилмайдиган авиация ўқ-дориларини «ақлли бомба»га айлантирувчи ускунани Украинага юборишни режалаштирмоқда, деб ёзади The Washington Post Американинг юқори мартабали расмийларига таяниб.
Газета манбаларига кўра, гап GPS Joint Direct Attack Munition (JDAM) технологиясига асосланган, турли хилдаги қуролларга бириктирилиши мумкин бўлган ускуналар тўплами ҳақида кетмоқда. Аввал АҚШ армияси ушбу технологияни бомбардимончи ва қирувчи самолётларда қўлланиладиган бомбалар учун ишлатган.
The Washington Post таъкидлашича, АҚШ президенти Жо Байден ёки унинг миллий хавфсизлик бўйича бош маслаҳатчиларидан бирортаси JDAM’ни Украинага юбориш ғоясини маъқуллаганми-йўқми, ҳозирча номаълум.
АҚШ Россиянинг Украинадаги босқини бошланганидан сўнг Киевга қурол-яроғ ва техника етказиб бериш бўйича ҳарбий ёрдамни кучайтирди. Декабрь ойи бошида Вашингтон Украинага ҳаво мудофааси тизимини мустаҳкамлаш ва дронларга қарши курашиш учун мўлжалланган техник воситалардан иборат 275 миллион долларлик янги ҳарбий ёрдам пакетини жўнатмоқчи экани маълум қилинди.
Шу билан бирга, Вашингтон Киевга айрим турдаги қуролларни, масалан, узоқ масофага учувчи ракеталарни етказиб беришдан бош тортмоқда. Пентагон буни Қўшма Штатлар Украинадаги вазият янада кескинлашувини истамаслиги билан изоҳлади.
Мавзуга доир:
Изоҳ (0)