O‘zbekistonda 2022-yil dekabr oyining o‘tgan davri davomida iste’molchilar tomonidan tabiiy gazdan noqonuniy va nooqilona foydalanish bo‘yicha 192 holatga chek qo‘yildi. Bu haqda Energetika vazirligi matbuot xizmati xabar berdi.
Ma’lum qilinishicha, vazirlik huzuridagi “O‘zneftgazinspeksiya”, huquqni muhofaza qiluvchi organlar va ishchi guruh a’zolari ishtirokida 12 kun davomida o‘tkazilgan nazorat tadbirlarida 17 mingga yaqin xonadonning kuz-qish mavsumida bir oylik iste’moliga teng hajmdagi tabiiy gazdan noqonuniy foydalanilgani aniqlandi.
Bunday noqonuniy holatlar natijasida davlat manfaatlariga yetkazilgan zarar miqdori 10,2 milliard so‘mni va gaz hajmi 10,2 million kub metrni tashkil etgan. Ushbu hajmdagi tabiiy gaz o‘rtacha 17 mingga yaqin hovli uylardagi xonadonlarning kuz-qish mavsumida bir oylik iste’molini tashkil qiladi.
Noqonuniy foydalanish holatlari asosan Navoiy viloyatida (2,4 milliard so‘m), Jizzaxda (2,0 milliard so‘m), Buxoroda (0,9 milliard so‘m), Qashqadaryoda (0,267 milliard so‘m), Toshkent viloyatida (0,8 milliard so‘m) va Toshkent shahrida (0,165 milliard so‘m) aniqlangan.
Aniqlangan holatlar yuzasidan rasmiylashtirilgan hujjatlar huquqni muhofaza qiluvchi organlarga yuborilgan.
Mavzuga doir:
- “Hududgazta’minot”ning Toshkent viloyati filiali direktori qamoqqa olindi
- Jizzaxda tabiiy gazdan noqonuniy foydalanib, davlat manfaatiga salkam 1,8 mlrd so‘m zarar yetkazgan tadbirkorga jinoyat ishi qo‘zg‘atildi
- Olmaliqdagi korxona 5 mingga yaqin xonadonning bir kunlik iste’moliga teng gazdan noqonuniy foydalangani aniqlandi
Izoh (0)