Qalin tuman va ko‘rish chegarasining pastligi Farg‘ona vodiysidagi bir nechta xalqaro aeroportlarda samolyotlarni qabul qilish va jo‘natishlar kechiktirilishiga sabab bo‘ldi, deb xabar bermoqda Uzbekistan Airports matbuot xizmati.
Xususan, manzil aeroportidagi noqulay ob-havo tufayli Uzbekistan Airways’ning HY87 Urganch — Farg‘ona reysi Urganch aeroportida ushlab qolindi. 73 yo‘lovchisi bo‘lgan samolyot mahalliy vaqt bilan soat 09:35 da uchishi kerak bo‘lgan.
Ko‘rish chegarasi 25 metrdan kam bo‘lganligi sababli HY71/72 Farg‘ona—Samarqand, HY84 Farg‘ona—Toshkent reyslari bekor qilindi. Shuningdek, Farg‘ona aeroporti Sankt-Peterburgdan uchgan samolyotni qabul qila olmadi va bort Toshkent aeroportiga yo‘naltirildi. Uzbekistan Airways’ning HY9628/9627 Toshkent—Farg‘ona—Moskva va HY081 Toshkent—Farg‘ona yo‘nalishidagi reyslari uchish vaqti o‘zgartirildi.
Quyuq tuman (ko‘rish — 300 metr) HY622 Moskva—Andijon reysi uchish aeroportida bir necha soatga kechiktirilishiga sabab bo‘ldi. Hozirda samolyot kutish zonasiga yo‘naltirildi va muqobil aerodromga jo‘nab ketadi.
Shuningdek, noqulay ob-havo sharoiti tufayli Namangan aeroportida bir qator reyslar qoldirilgan. Beqaror ob-havo tufayli aeroport vaqti-vaqti bilan samolyotlarni qabul qilish va jo‘natishlarni cheklashga majbur bo‘lmoqda.
Farg‘ona, Andijon va Namangan xalqaro aeroportlarida ob-havo sharoiti yaqin orada yaxshilanishini kutilmoqda.
Izoh (0)