Hasbulla Magomedov — 2 yil ichida jahon yulduziga aylangan dog‘istonlik 20 yoshli bloger. Internetda u Hasbik nomi bilan tanilgan va mitti kavkazlik bolakayning videolari ijtimoiy tarmoqlarda million martalab ko‘rilmoqda.
Dunyo yulduzlari ham Hasbik bilan do‘st — Shakil O’Nildan tortib Habib Nurmagomedovgacha. Magomedov Forbes jurnalining 30 yoshgacha bo‘lgan eng istiqbolli rossiyaliklar ro‘yxatiga kirdi. Yaqinda aralash yakkakurash bo‘yicha asosiy promoushen — UFC Hasbik bilan shartnoma imzoladi.
Dunyoni zabt etgan kichik bloger Hasbekning siri nimada?
Hasbik qulupnay haqidagi virusli videodan so‘ng Dog‘istonda yulduzga aylandi.
2020-yilda Dog‘istonda bloger paydo bo‘ldi — Hasbulla Magomedov. Yigitcha 18 yoshda bo‘lsa ham bolaga o‘xshardi: uning bo‘yi bor-yo‘g‘i 93 santimetr, vazni 18 kilogramm edi. Hasbullaning ovozi juda baland bo‘lib, foydalanuvchilar mehrini qozondi.
Dog‘istonlik yigitcha qulupnay yegan videosi bilan mashhur bo‘ldi. Aytarli biror narsa bo‘lmasa-da, video qanday qilib virusga aylanishi mumkin? Ammo videoda Hasbulla mashhur bo‘lib ketgan iborani aytadi: “Rostini aytsam, qulupnay bomba. Qulupnayni juda yaxshi ko‘raman”.
Video ijtimoiy tarmoqlarda tarqaldi va mashhur bo‘ldi, Magomedov esa vatanida yulduzga aylandi.
Birinchi muvaffaqiyatdan so‘ng Hasbik tarmoqda tez-tez paydo bo‘la boshladi. Hasbulla — bloger, lekin u hech qachon o‘zini videoga olmagan. Hasbik atrofida uning hayotini kameraga tushirib, yigitchani qo‘llarida ko‘tarib, sovg‘a-salomlar berib yuradiganlar ko‘p.
Hasbikning atrofidagilar haqida ko‘p narsa ma’lum emas. Taxminlarga ko‘ra, uning eng yaqin do‘sti Magomed bo‘lib, u nafaqat unga uy ishlarida yordam beradi, balki videoda ham tez-tez ko‘rinib turadi.
Ajablanarlisi, Hasbikning prodyuseri yo‘q, uning ko‘tarilishida do‘stlarining xizmati katta. Shunday vaqtlar bo‘ldiki, Hasbikning vloglari ijtimoiy tarmoqlarni to‘ldirib, million martalab ko‘rildi. Do‘stlari Hasbikning hayotini suratga olishdi, bloger esa kontent yaratdi. Foydalanuvchilarni hatto Hasbikning mashina haydash usuli ham hayratda qoldirdi va uning jumlalari mashhur bo‘lib ketdi.
Biroq Hasbikning ota-onasi o‘g‘lining sevimli mashg‘ulotlariga qarshi edi, ular o‘g‘liga tinchroq kelajakni xohlashardi. Ularni juda tez paydo bo‘lgan xeyterlar yanada ko‘proq qo‘rqitardi. Ammo Hasbik mashhurlikni yoqtirardi va u oilasi uchun mustaqil pul ishlab topishni istardi.
Hamma Hasbikning o‘ziga xos shaxs ekanini tushundi, u shu sababli mashhur bo‘ldi. Ammo blogerning o‘zi kasalligi haqida gapirishni yoqtirmaydi. Magomedovning so‘zlariga ko‘ra, shifokorlar irsiy o‘zgarishlarning sababini aniqlay olmagan va aniq tashxis qo‘yishmagan.
Men o‘zimni nogiron deb hisoblaymanmi? Yo‘q, men bunday deb o‘ylamayman, lekin ota-onam shunday deb o‘ylashadi. Shifokorlar ham. Menda faqat o‘sish bilan bog‘liq muammolar bor. Tez yurganimda esa charchab qolaman. Aqlim 18 yoshlarnikidek. Boshqa 18 yoshli bolalar menga hasad qilishadi, chunki ular uyda o‘tirib, pul topishni xohlashadi, lekin qo‘lidan kelmaydi, — deydi Hasbik.Abdurozik bilan omadsiz jangidan keyin dunyo Hasbikni sevib qoldi
Qulupnay haqidagi videodan keyin Hasbikning mashhurligi pasayishni boshladi. Ammo keyinchalik uning hayotida Asxab Tamayev paydo bo‘ldi — Hasbikni o‘z kanali uchun suratga tushishga taklif qilgan chechen blogeri.
Tamayev internet tendensiyalari qanday ishlashini yaxshi bilardi, uning o‘zi ham g‘ayrioddiy ko‘rinishi bilan hayratda qoldirardi. Tarmoqda Asxab chechenistonlik Halk nomi bilan mashhur bo‘lib, bloger, ayniqsa, bir paytlar 56 sm ga yetgan katta bo‘yni bilan hayratda qoldirardi.
Asxab mitti dog‘istonlik va yana bir “odamcha” — tojikistonlik 17 yoshli qo‘shiqchi va bloger Abdurozik o‘rtasida mushtlashuv uyushtirishga qaror qiladi. Abdurozik ham Hasbikka o‘xshash o‘lchamga ega edi, shu tufayli ham internetda mashhur bo‘lib ketgandi: Abdurozik go‘dakka o‘xshardi, lekin shu bilan birga u yaxshi qo‘shiq kuylar va chiroyli kiyinib yurardi.
Hasbik va Abdurozik o‘rtasidagi jang 2021-yilning bahorida e’lon qilingandi. Mitti blogerlarining matbuot anjumani ijtimoiy tarmoqlarni portlatib yubordi. Rossiyadan g‘ayrioddiy duel shon-shuhrati G‘arbgacha yetib bordi, UFC jangchilari va hatto promouterlik rahbari Dueyn Uayt Hasbik va Abdurozikning videolarini repost qila boshladi.
Biroq jang bo‘lmadi: go‘yo Hasbikni ko‘ndirisholmagan. Shartlar oddiy edi: har biri bir daqiqadan ikki raund. Umuman olganda, Tamayev Hasbik va Abdurozikka zarbalarsiz kurashadigan grappling jangini taklif qilgandi.
Tamayev ikki-uch oy ichida uni millioner qilishga va’da berib, Hasbikni yanada ruhlantirmoqchi bo‘ldi. Ammo Hasbik yaxshigina gonorarni rad etdi: ehtimol, ko‘ngli o‘zi pul ishlay olishini sezgandir. Va bu to‘g‘ri qaror edi — tez orada Hasbik butun dunyoga tanildi. Bloger faol intervyu bera boshladi.
Hasbik millionlab pul ishladi va UFC bilan shartnoma imzoladi
Abdurozik bilan muvaffaqiyatsiz jang Hasbullohni yanada mashhur qildi. Butun dunyo bloger haqida bildi va kichkina odamchalarning videolari ijtimoiy tarmoqlarni portlatib yubordi. Shubhasiz, bundan keyin Hasbik yangi imkoniyatlarga ega bo‘ldi, gonorari ham sezilarli darajada oshdi. Biroq dog‘istonlik uchun burilish nuqtasi Abu-Dabidagi UFC 267 ga sayohat bo‘lib, u yerda MMA olamini zabt etdi.
Turnir 2021-yil oktabr oyida bo‘lib o‘tdi, Hasbik u yerga UFS prezidenti Dueyn Uaytning shaxsiy taklifiga binoan keldi. Bloger Dog‘istondagi ko‘pchilik kabi aralash yakkakurashni yaxshi ko‘rardi va respublikaning mashhur jangchilari: Habib Nurmagomedov, Islom Maxachev, Zabit Magomedsharipov va boshqalar bilan do‘st edi.
Abu-Dabida Hasbik turnir boshlanishidan oldin ham bir qancha virusli videolarni suratga oldi. Bloger hazillashib, sobiq UFC chempioni Deniel Kormyening yuziga “kutilmagan” zarba berdi. Uayt bilan ham ko‘rinish berdi, zalda ham video suratga oldi – Abu-Dabiga kelgan Abdurozik bilan janjallashib qolishiga sal qoldi.
Turnirda Hasbikka oktagon ro‘parasidagi birinchi qatordan maxsus joy berildi. Dog‘istonlik Islom Maxachev asosiy kardda jang qildi. Den Xukerni mag‘lub etgandan so‘ng, u Hasbikni oktagonga olib chiqdi va boshi uzra ko‘tardi. Turnirda bo‘lgan Maxachevning yaqin do‘sti Habib esa blogerni yelkasiga mindirib oldi.
Shov-shuvli gastroldan keyin Hasbik “mini-Habib” laqabini oldi — G‘arbda papax kiygan har qanday dog‘istonlik Nurmagomedov bilan assotsatsiya qilinadi.
Turnirdan so‘ng UFC rahbari Uayt Hasbik ishtirokidagi video uning ijtimoiy tarmoqlarida eng ommabopi bo‘lganini tan oldi: “6,7 million obunachim bor va ulardan 6,4 millioni ushbu videoni tomosha qilgan. Aqlbovar qilmaydi!”
UFC bilan hamkorlik qilgandan so‘ng, Hasbikning karyerasi o‘sdi va u dollarlik millionerga aylandi. Joriy yilning aprel oyida Forbes jurnali Rossiyaning 30 yoshgacha bo‘lgan eng istiqbolli yulduzlari reytingiga kiruvchi nomzodlarni taqdim etdi — Hasbik ham ro‘yxatga kirdi.
Xuddi shu oyda bloger NFT portretlaridan 160 million rubl ishlab oldi. Aktyorlar, musiqachilar va sportchilar obrazidagi Hasbik tasvirlarining sotuvi dekabr oyida boshlangan. To‘rt oydan kamroq vaqt ichida u 590 dona Ethereum (o‘sha paytdagi kurs bo‘yicha taxminan 2 million dollar) qiymatidagi 1700 ta asar sotdi.
Sentabr oyida esa Hasbik UFC bilan besh yillik shartnoma imzolagani ma’lum bo‘ldi. Hamkorlik faqat ommaviy axborot vositalarida ishlashni, shu jumladan, turnirlarga tashrif buyurishni nazarda tutadi. Hasbik obrazi esa yangi UFC simulyatoriga qo‘shilishi rejalashtirilgan.
Hasbik Konordan u bilan jang qilishni talab qildi
2019-yilda irlandiyalikni mag‘lub etgan Habib bilan bo‘lgan jangi tufayli Hasbik Dog‘istondagi ko‘pchilik kabi Makgregorga yomon munosabatda bo‘lgan. Shu bois Hasbik Uaytdan Konor bilan jang tashkil qilishni so‘ragan.
“Hozir UFC bilan shartnomam bor. Agar MakGregor haqiqatan ham erkak bo‘lsa, Abu-Dabida ko‘rishamiz. Uni Habib allaqachon yenggan. Menimcha, Konorning Meyvezer bilan jangidan olgan pullari tugagan, endi unga ko‘proq e’tibor kerak”, — deb yozadi Hasbik.
Albatta, Hasbik va MakGregor o‘rtasidagi jang dog‘istonliklarning UFC’dagi odatiy jangi kabi bo‘lmaydi: sog‘lig‘i sababli Hasbikka ruxsat berilmaydi. Har bir turnir oldidan jangchilar puxta tekshiruvdan o‘tadi, sport komissiyalari ularni hatto sog‘lig‘idagi kichik muammolari uchun ham ringga chiqarmaydi. Shuning uchun Hasbikni UFC’da jangchi sifatida ko‘rmasligimiz aniq, lekin u albatta turnirlarda qatnashadi.
Katta ehtimol bilan UFC va Hasbik o‘rtasidagi hamkorlik yanada muvaffaqiyatli bo‘ladi. Axir, dunyo dog‘istonlik blogerni sevadi. Bu arab mintaqalariga ham tegishli — UFC ko‘pincha Abu-Dabida turnirlar o‘tkazadi, u yerda Kavkazdan kelgan rossiyalik jangchilar ko‘pchilikni tashkil qiladi. Biroq Hasbikning faoliyati sharq mamlakatlari bilan chegaralanib qolishi dargumon — katta ehtimol bilan UFC u uchun kattaroq rejalar tayyorlayotgan ko‘rinadi.
Mavzuga doir:
Izoh (0)