Surxondaryo viloyati Boysun tumanida daraxtlar noqonuniy kesilgani haqida xabar berilgan edi. Viloyat prokuraturasi holat yuzasidan jinoyat ishi qo‘zg‘atilganini ma’lum qildi.
Xabarda aytilishicha, viloyat ekologiya va atof-muhitni muhofaza qilish boshqarmasi ma’sul xodimlari tomonidan Boysun davlat o‘rmon xo‘jaligi “Machay” o‘rmon bo‘limi 5-aylanma 17-kvartalida tekshiruv olib borilganda, “Qizil kitob”ga kiritilgan “Zarafshon archasi”, “Shumtol”, “Uchqad” va “Zarang” nomli jami 38 tup daraxtlar shikastlantirilgani oqibatida o‘simlik dunyosiga jami 560 million 550 ming so‘mlik moddiy zarar yetkazilgani bo‘yicha xulosa berilgan.
Surxondaryo viloyati Ekologiya va atrof-muhitni muhofaza qilish boshqarmasining 9-dekabr kuni e’lon qilgan xabarida jami 54 tup daraxt kesilgani qayd etilgandi.
Mazkur holat yuzasidan 12-dekabr kuni Boysun tumani prokuraturasi tomonidan Jinoyat kodeksining 202-moddasi (hayvonot yoki o‘simlik dunyosidan foydalanish tartibini buzish) 3-qismi “j” bandi bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Mavzuga doir: Toshkentdagi qurilish kompaniyasi ogohlantirish olganiga qaramay, daraxtlarni nobud qilgani aniqlandi
Izoh (0)