Andijondagi xonadonda yong‘in yuz berib, bir kishi voqea joyida halok bo‘ldi

Andijon viloyatining Andijon tumanidagi xonadonda yong‘in yuz berib, bir kishi voqea joyida halok bo‘ldi.

Tuman hokimligi matbuot xizmati bergan xabarga ko‘ra, yong‘in 12-dekabr kuni soat 13:41 larda Andijon tumani “Sanoat” MFY Sanoatchi ko‘chasidagi uyda boshlangan. Ikkita yong‘in-qutqaruv ekipaji soat 13:43 da voqea joyiga yetib borgan va yong‘in soat 13:46 da qurshab olinib, soat 14:04 da o‘chirilgan.

Yong‘in oqibatida ushbu xonadonda yashovchi 1959-yilda tug‘ilgan M.A. olgan tan jarohati natijasida voqea sodir bo‘lgan joyda vafot etgan. Uning farzandi 1991-yilda tug‘ilgan Z.A. 85 foiz kuyish jarohati bilan Respublika shoshilinch tibbiy yordam ilmiy markazining Andijon filialiga yotqizilgan.

Aniqlanishicha, yong‘in isitish pechidan foydalanishda ehtiyotsizlik oqibatida kelib chiqqan. Uyning 40 metr kvadrat qismi yonib zararlangan, 200 metr kvadrat qismi saqlab qolingan.

Bundan avval Namangandagi xonadonda qo‘lbola pech sabab yong‘in yuz berib, ikki kishi — biri 65 foiz, ikkinchisi 95 foiz  kuyish jarohati olgani haqida xabar berilgandi.

Mazvuga doir: Termizdagi xonadonlarning birida portlash sodir bo‘ldi