Сурхондарё вилояти Бойсун туманида дарахтлар ноқонуний кесилгани ҳақида хабар берилган эди. Вилоят прокуратураси ҳолат юзасидан жиноят иши қўзғатилганини маълум қилди.
Хабарда айтилишича, вилоят экология ва атоф-муҳитни муҳофаза қилиш бошқармаси маъсул ходимлари томонидан Бойсун давлат ўрмон хўжалиги «Мачай» ўрмон бўлими 5-айланма 17-кварталида текширув олиб борилганда, «Қизил китоб»га киритилган «Зарафшон арчаси», «Шумтол», «Учқад» ва «Заранг» номли жами 38 туп дарахтлар шикастлантирилгани оқибатида ўсимлик дунёсига жами 560 миллион 550 минг сўмлик моддий зарар етказилгани бўйича хулоса берилган.
Сурхондарё вилояти Экология ва атроф-муҳитни муҳофаза қилиш бошқармасининг 9 декабрь куни эълон қилган хабарида жами 54 туп дарахт кесилгани қайд этилганди.
Мазкур ҳолат юзасидан 12 декабрь куни Бойсун тумани прокуратураси томонидан Жиноят кодексининг 202-моддаси (ҳайвонот ёки ўсимлик дунёсидан фойдаланиш тартибини бузиш) 3-қисми «ж» банди билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Мавзуга доир: Тошкентдаги қурилиш компанияси огоҳлантириш олганига қарамай, дарахтларни нобуд қилгани аниқланди
Изоҳ (0)