Toshkentdagi yana bir qurilish kompaniyasi daraxtlarni nobud qilgani aniqlandi. Bu haqda Davlat ekologiya qo‘mitasi matbuot xizmati xabar berdi.
Ma’lum qilinishicha, poytaxtning Yakkasaroy tumani Shota Rustaveli ko‘chasi “Do‘stlik” bog‘i yaqinida yarim tunda daraxtlar kesilgani to‘g‘risida kelib tushgan ma’lumotga asosan Davlat ekologiya qo‘mitasi, Ekologik partiyasi faollari, Toshkent shahar ekologiya boshqarmasi, Yakkasaroy tuman hokimligi, tuman prokuraturasi hamda tuman Ichki ishlar bo‘limi xodimlari tomonidan hamkorlikda o‘rganish o‘tkazildi.
O‘rganishlar davomida Vinera Tower MCHJ tomonidan qurilish qilish maqsadida hududdagi 2 tup qimmatbaho va 4 tup kam qimmatli bo‘lgan jami 6 tup daraxt tegishli ruxsatnomasiz, qonunchilikka zid ravishda boshqa joyga ko‘chirib o‘tkazilishi oqibatida daraxtlar nobud qilingani, shuningdek, qurilish uchun kotlovan qazilishi natijasida 4 tup daraxtning ildiziga shikast yetkazilgani aniqlandi.
2022-yilning 27-sentabrida Yakkasaroy tumani ekologiya bo‘limi xodimlari tomonidan mazkur hududda xatlov o‘tkazilib, 22 tup ko‘p yillik daraxtlar mavjudligi aniqlangan. Ushbu daraxtlarni kesmaslik bo‘yicha qurilish tashkilotiga majburiy ko‘rsatma berilgan.
Shunga qaramasdan, 21-noyabr kuni qurilish tashkiloti tomonidan ushbu 22 tup daraxtning 6 tupi noqonuniy ravishda boshqa hududga ko‘chirib o‘tkazilgan. 4 tup daraxtning esa ildiziga shikast yetkazilgan.
Ushbu holat bo‘yicha “O‘simlik dunyosini muhofaza qilish va undan foydalanish to‘g‘risida”gi qonunining 32, 37-moddalari talabi buzilib, o‘simlik dunyosiga ko‘p miqdorda zarar yetkazilgani aniqlandi.
Hozirda qurilish ishlari boshlangan hududda 16 tup manzarali daraxt mavjud.
Yuqoridagi holatlardan kelib chiqib, daraxtlarning noqonuniy ko‘chirilishi va shikastlanishi natijasida dastlabki hisob-kitoblarga ko‘ra, o‘simlik dunyosiga 218 million 370 ming so‘m zarar yetkazilgan.
Amaldagi qonunchilik talablariga ko‘ra, qurilish loyihalarini amalga oshirishdan oldin ekologik me’yoriy loyiha hujjatlari ishlab chiqilishi hamda majburiy tartibda Davlat ekologik ekspertizasidan o‘tkazilishi belgilangan. Aniqlanishicha, mazkur qurilish obyekti bo‘yicha qonunchilikda belgilangan tartibda Davlat ekologik ekspertiza xulosasi olinmagan.
O‘rganish natijasi bo‘yicha to‘plangan materiallar tegishli tartibda rasmiylashtirilib, tuman prokuraturasiga taqdim etilgan.
Xabarda aytilishicha, ushbu kompaniya tomonidan bundan avval ham, 2022-yilning 23-martida kuni shu hududdagi 6 tup daraxt noqonuniy ravishda kesilgan va o‘simlik dunyosiga 430 million 515 ming so‘m miqdorida zarar yetkazilgan.
Ushbu holat Toshkent shahar ekologiya boshqarmasi tomonidan tegishli tartibda ramiylashtirilib, tuman prokuraturasiga taqdim qilingan va yetkazilgan zararni undirish uchun 16-sentabrda Toshkent tumanlararo iqtisodiy sudining ajrimi chiqarilgan.
Avvalroq Toshkentning Yashnobod tumanida qurilish kompaniyasi tomonidan 16 tup daraxt kesilgani yuzasidan jinoyat ishi qo‘zg‘atilgandi. Kompaniyadan o‘simlik dunyosiga yetkazilgan 3,5 milliard so‘m zarar undirilgan.
Izoh (0)