«Катта еттилик» мамлакатлари саммити иштирокчилари 12 декабрь кунги саммит якунида баёнот қабул қилиб, Россия президентининг Украинага бостириб киргани учун жавобгарликка тортилишига, Россия эса етказилган ҳарбий зарар учун товон тўлашига эришишларини маълум қилди.
Британия ҳукумати томонидан эълон қилинган якуний баёнотда, хусусан, қуйидаги жумлалар бор:
«Биз тўла қатъият билан айтишимиз мумкинки, Россия охир-оқибат ўзининг шафқатсиз уруши натижасида зарар кўрган ёки вайрон бўлган муҳим инфратузилмани қайта тиклаш учун бадал тўлайди. Ҳарбий жиноятлар ва бошқа ваҳшийликлар жазоси қолиши мумкин эмас. Биз президент Путинни ва бошқа айбдорларни халқаро ҳуқуққа мувофиқ жавобгарликка тортамиз».
«Катта еттилик» мамлакатлари бу йўналишда айнан қандай чораларни кўрмоқчи эканига баёнотда аниқлик киритилмаган.
«Катта еттилик» давлатлари, шунингдек, зарурат мавжуд бўлар экан, Украинани ҳар томонлама қўллаб-қувватлашини яна бир марта маълум қилди ва уруш тугатилиши кераклигини — Россия ўт очишни тўхтатиб, бутун Украина ҳудудидан ўз қўшинларини олиб кетиши кераклигини таъкидлади.
Саммитда Украина президенти Владимир Зеленский ҳам қатнашди. У, хусусан, тинчлик ўрнатилишини тезлаштириш учун зарур бўлган учта қадамни таклиф қилди.
Изоҳ (0)