“Turkiyada 150 mln barrel neft zaxirasiga ega yangi kon topildi” — Erdo‘g‘on

Turkiya mamlakat shimoli-sharqidagi Gabar tog‘i hududida yangi neft konini topdi. Bu haqda mamlakat prezidenti Rajab Toyyib Erdo‘g‘onga tayanib, Anadolu xabar berdi.

Uning so‘zlariga ko‘ra, topilgan neft zaxiralarining sof hajmi 150 million barrelni tashkil etadi. Erdo‘g‘on zaxiralarning qiymati qariyb 12 milliard dollarga baholanayotganini aytdi.

“Bu 2022-yilda quruqlikda topilgan eng yirik 10 ta kondan biridir”, — deydi Turkiya rahbari.

Noyabr oyida Erdo‘g‘on Turkiya yangi dunyo tartibining markazida bo‘lishi kerakligini aytgandi. Siyosatchi mamlakat o‘zgaruvchan global siyosiy va iqtisodiy arxitekturaning barcha imkoniyatlaridan foydalanishi kerakligini qayd etgan. U Turkiya avvalgidek davlat emasligini ham qo‘shimcha qilgan.