Владимир Путиннинг анъанавий матбуот анжумани, катта эҳтимол билан, Украинадаги урушнинг «ўзбошимчалик билан муҳокама қилиниши»га йўл қўймаслик мақсадида бекор қилинган. Бу ҳақда Буюк Британия Мудофаа вазирлиги ҳарбий разведкаси маълумотида айтилади.
12 декабрь куни Россия президенти матбуот котиби Дмитрий Песков 2022 йилда Путиннинг журналистлар билан якуний матбуот анжумани ўтказилмаслигини эълон қилди. Бундай воқеа ўн йил ичида биринчи марта содир бўлишидир. Тадбир бекор қилиниши сабабларини Кремль келтириб ўтмади.
Буюк Британия Мудофаа вазирлиги қайд этишича, якуний матбуот анжумани доим Россия президенти жамоатчилик тадбирлари тақвимининг муҳим қисми бўлиб келган ва ундан «Путиннинг эҳтимолий ҳалоллигини намойиш қилиш имконияти» сифатида фойдаланилган.
«Саволлар олдиндан текширилиши деярли аниқ бўлса-да, анжуманнинг бекор қилиниши, катта эҳтимол билан, Россияда урушга қарши кайфият кенг тарқалаётгани борасидаги хавотирлар билан боғлиқдир.
Кремль мансабдорлари Путин иштирок этадиган ҳар қандай тадбир ‘махсус ҳарбий операция’нинг ўзбошимчалик билан муҳокама қилинишига айланиб кетиши эҳтимолига ортиқ даражада куйинади», — дейилади хабарда.
2022 йилда Путин россияликлар билан анъанавий «тўғридан-тўғри эфир»ни ҳам ўтказгани йўқ ва Федерал кенгашга мурожаат билан ҳам чиққани йўқ. «РИА Новости»нинг Давлат думасидаги манбаси маълум қилишича, мурожаат 27 декабрь куни эълон қилиниши мумкин.
Владимир Путин катта матбуот анжуманларини 2001 йилдан ўтказиб келади, 2012 йилдан улар декабрь ойида ташкил қилина бошлаган. Шу пайтгача фақат 2005 йилда президент анъанавий матбуот анжуманини ўтказмаган. Шунингдек, 2009 йилдан 2011 йилгача, Путин Россия бош вазири лавозимини эгаллаган даврда ҳам бу тадбир ташкил қилинмаган.
Аввалроқ Владимир Путиннинг йиллик катта матбуот анжумани 2022 йилда бўлиб ўтмаслиги мумкинлиги, ҳозирча уни йил охиригача ўтказиш тўғрисида якуний қарорга келинмагани маълум бўлганди. «РБК» манбалари якуний қарор қабул қилишда «бошқа нарсалар қатори махсус ҳарбий операция зонасидаги вазият ҳам ҳисобга олинишини» таъкидлаганди. Шунингдек, президентнинг Федерал Мажлисга мурожаати қачон бўлиб ўтиши аниқ эмасди, бунга тайёргарлик, Песков аввалроқ айтганидек, аллақачон бошланган.
Изоҳ (0)