Агар Греция АҚШдан олинган қуролларни Додеканес архипелагига юборса, бу Анқаранинг Тайфун баллистик ракетаси билан жавоб қайтаришига сабаб бўлади, дея огоҳлантирди Туркия президенти Ражаб Тоййиб Эрдўғон.
«Ҳозир биз ўз ракеталаримизни ишлаб чиқаришни бошлаганмиз, бу грекларни қўрқитмоқда. Тайфун десангиз, греклар қўрқиб кетади ва ‘У Афинага зарба беради’, дейди. Ҳа, зарба беради, агар сиз тинчимасангиз, ороллар учун Америкадан нимадир сотиб олишга уринсангиз. Туркия каби давлат бирор чора кўриши керак», — деди Туркия президенти.
Тайфун ракетаси Туркия ҳарбийлари томонидан октябрь ойида синовдан ўтказилган эди. Туркия матбуоти манбаларининг қайд этишича, Тайфун ракеталари Туркияда бир неча йил давомида яширин равишда ишлаб чиқилган. Мамлакат расмийларининг таъкидлашича, ракета 561 км масофани 456 сонияда босиб ўта олади.
Эрдўғоннинг таҳдидларида гап Додеканес ороллари гуруҳи (бошқа номи Жанубий Спорадалар) ҳақида кетмоқда. Архипелагга 15 та катта ва 150 та кичик ороллар, жумладан, Родос киради, уларнинг умумий майдони 2670 квадрат километр. Ороллар Туркиянинг жануби-ғарбий қисмида жойлашган бўлиб, баъзи жойларда Греция ва Туркия ҳудудлари орасидаги масофа 5 километрга ҳам етмайди.
Ороллар узоқ вақт давомида Усмонли империяси, 1912—1947 йилларда эса Италия томонидан назорат қилинган — бу 1923 йилда Лозанна шартномаси билан тасдиқланган. Иккинчи Жаҳон урушидан сўнг, Буюк Британия ва Греция олдидаги оролларни назорат қилиш Париж тинчлик шартномасига биноан, Грецияга топширилди.
Туркия даъво қилишича, архипелагнинг қуролсизлантирилган мақомига қарамай, Греция оролларда ҳарбий салоҳиятини оширмоқда. «Агар Греция қуролсизлантирилган мақомни бузишни тўхтатмаса, ороллар суверенитети масаласи муҳокамага қўйилади», — дея огоҳлантирган Туркия ташқи ишлар вазири Мавлут Чавошўғлу июнь ойида. Грециянинг таъкидлашича, Анқара оролларда қуролли кучларнинг бўлиши ҳақидаги шартномаларни нотўғри талқин қилмоқда ва бу Афина Туркиянинг душманлик ҳаракатлари туфайли ўзини ҳимоя қилиш учун қонуний асосларга эга эканини кўрсатмоқда.