Chiptalar sotish bo‘yicha servislar ma’lumotlariga ko‘ra, 2022-yilda Rossiyadan parvozlar uchun eng ommabop yo‘nalishlarga Tojikiston, Qirg‘iziston, O‘zbekiston, Armaniston, Gruziya va Turkiya kirdi.
“RBK” yozishicha, “Tutu.ru” chiptalar servisi ma’lumotlariga qaraganda, 2022-yilda Rossiyadan chet elga uchib ketgan yo‘lovchilarning eng katta ulushi (17,22%) Tojikistonga to‘g‘ri kelgan. O‘tgan yil bilan solishtirganda, bu ko‘rsatkich bir necha marta o‘sgan. Ushbu servis mijozlari orasida eng talabgir yo‘nalishlar ro‘yxatiga Qirg‘iziston, O‘zbekiston, Armaniston, Ozarbayjon, Turkiya, Belarus, Qozog‘iston, BAA va Gruziya ham kirdi.
OneTwoTrip servisi ham Tojikiston (to‘rt marta) va Qozog‘istonga (besh marta) parvozlarga qiziqish keskin o‘sganini qayd etdi. Tojikiston ushbu kompaniya mijozlari orasidagi eng ommabop yo‘nalishlar uchligiga kirdi, undan oldinda esa Armaniston va Turkiya joylashdi.
“Kupibilet” servisida esa xorijiy yo‘nalishlar orasida yetakchilikni Turkiya egalladi — sotilgan chiptalarning deyarli chorak qismi uning ulushiga to‘g‘ri kelgan. Shuningdek, ushbu kompaniyadagi eng ommabop yo‘nalishlar o‘nligiga Armaniston, O‘zbekiston, Qirg‘iziston, Ozarbayjon, Tojikiston, Qozog‘iston, Belarus, BAA va Isroil ham kirgan.
Aviasales orqali sotilgan chiptalarning aksariyati Turkiya hissasiga to‘g‘ri keladi. Ayni vaqtda esa servis ushbu mamlakatga nisbatan talab pasayganini qayd etdi: 2021-yilda xorijiy yo‘nalishlarga sotilgan barcha chiptalarning 28 foizi Turkiyaga tegishli bo‘lgan bo‘lsa, 2022-yilda bu ko‘rsatkich 19 foizgacha tushib qolgan. Aviasales talqini bo‘yicha top beshlikka BAA, Tailand, Gruziya va Isroil ham kirdi.
Rossiya Ukrainaga bostirib kirgach, Yevroittifoq mamlakatlari Rossiya aviakompaniyalari uchun o‘z havo hududlarini yopdi, Rossiya hukumati xuddi shunday choralar bilan javob qildi. Kuzda Yevroittifoqning bir qator mamlakatlari Shengen sayyohlik vizalari bo‘lgan rossiyaliklarni o‘z chegaralaridan kiritmasligini e’lon qildi.
Urush boshlanganidan keyin darhol Rossiya aholisining ko‘pchiligi mamlakatdan ketishga qaror qilib, aviareyslar ham orqali yaqin xorij davlatlariga jo‘nab ketdi. Shunday vaziyat sentabrda Rossiyada safarbarlik e’lon qilinganidan keyin ham kuzatildi.
Mavzuga doir:
- Rossiyada safarbarlik boshlanganidan keyin 400 mingdan ortiq odam u yerdan Qozog‘istonga o‘tgani ma’lum qilindi
- O‘zbekistonga 9 oyda Rossiyadan qancha fuqaro kirib kelgani ma’lum qilindi
- Safarbarlikdan so‘ng rossiyaliklar eng ko‘p O‘zbekiston va boshqa mamlakatlarning sayohat sug‘urtasini sotib olgan
Izoh (0)