“Bu voqea tizimning kechirilmas xatosi bo‘ldi. Prezident oldida ham uyatlimiz” — Ichki ishlar vaziri o‘rinbosari IIB binosida 15 yoshli o‘smir vafot etgani haqida

Farg‘ona viloyatining Qo‘qon shahridagi IIB binosida 15 yoshli bola vafot etgani ko‘plab muhokamalarga sabab bo‘lgan edi. Mazkur holat yuzasidan Ichki ishlar vaziri o‘rinbosari, polkovnik Bekmurod Abdullayev O‘zAga o‘z fikrlarini bildirib o‘tdi.

Bir norasidani voyaga yetkazish qancha mashaqqat talab etadi?! Eslasam, hamon yuragim og‘riydi. Bu holat haqiqiy sovuqqonlik bo‘ldi. Xatoga yo‘l qo‘ygan xodimlar qamoqqa olindi. O‘zim boshchiligimda attestatsiya komissiyasi tashkil etildi. Xodimlar to‘liq shahodatlashdan o‘tadi.

Tan olaman, bu voqea tizimning kechirilmas xatosi bo‘ldi. Bir yil oldin O‘zbekiston Respublikasi Vazirlar Mahkamasining qarori bilan tasdiqlangan “Voyaga yetmaganlarga ijtimoiy-huquqiy yordam ko‘rsatish markazlari to‘g‘risida”gi nizomni ishlab chiqishda bosh qosh bo‘lganmiz. Mas’uliyatni bo‘ynimizga olganmiz. Prezidentga mazkur tizimni “ipidan ignasigacha” to‘g‘ri tashkil etish uchun so‘z berganmiz. Prezident oldida ham uyatlimiz.

Ishoning, agar shu bolaning hayotini saqlab qolish uchun kerak bo‘lsa, men hech ikkilanmay, o‘z lavozimimdan voz kechardim, — degan Bekmurod Abdullayev.

Eslatib o‘tamiz, viloyat prokuraturasi bergan ma’lumotga ko‘ra, 2007-yilda tug‘ilgan R.A. 2022-yilning 16-oktabrida Buvayda tumanining Yangiqo‘rg‘on qishlog‘ida joylashgan “Ansor” savdo majmuasiga ota-onasining nazoratisiz aylangani borgan. R.A. mazkur majmuada o‘g‘irlik qilmoqchi bo‘lganida IIB xodimlari tomonidan ushlangan va Qo‘qon shahridagi Voyaga yetmaganlarga ijtimoiy-huquqiy yordam ko‘rsatish markaziga yuborilgan. 17-oktabr kuni uning sog‘lig‘i yomonlashib, hushidan ketgani sababli unga tez tibbiy yordam ko‘rsatilgan, biroq shifoxonaga olib ketilayotgan vaqtida bola vafot etgan.

Tergov mobaynida ikki nafar voyaga yetmagan tarbiyalanuvchi marhum R.A.ni urib, uning o‘limiga sabab bo‘lgan tan jarohatlari yetkazgani ma’lum bo‘lgan va ular qamoqqa olingan. Voqea sodir bo‘lgan kunda navbatchilik qilgan 2 nafar IIO xodimi tarbiyalanuvchilarni nazoratsiz qoldirib, janjalni oldini olmagani uchun IIO safidan bo‘shatilib, xodimlarga nisbatan to‘plangan hujjatlar qonuniy chora ko‘rishlik uchun viloyat prokuraturasiga taqdim qilingan.

Ayni paytda holat bo‘yicha Jinoyat kodeksining 104-moddasi 3-qismi “d” bandi bilan (jabrlanuvchining o‘limiga sabab bo‘lgan og‘ir tan jarohati yetkazish) jinoyat ishi qo‘zg‘atilib, tergov harakatlari olib borilmoqda.