Qashqadaryo viloyatining Ko‘kdala tumani tibbiyot birlashmasiga qarashli Chiyali tug‘uruqxonasida onalar elektr energiyasi yo‘qligi sabab chaqaloqlari sovuqda qiynalayotganini ma’lum qildi. Bu haqda “Rost24.uz” saytida xabar berildi.
Ularning aytishicha, shifoxonada 24 soatdan beri elektr energiyasi bo‘lmagan.Bizga umuman svet bermay qo‘ydi, shifoxonalarda ahvolimiz og‘ir, chaqaloqlarimiz o‘ranib, sovuqda muzlab yotibdi, — deydi videomurojaat mualliflari.
“Otopleniye”larimiz ham, gaz ham svetga ishlaydi. Ishchilarimiz ham o‘ranib yuribdi, ahvolimiz og‘ir. Hech bo‘lmasa shifoxonaga svet beringlar. Tug‘uruq jarayonini boshidan kechirgan ayollar ikki-uchtalab ko‘rpa yopinib yotibdi. Sizlardan iltimos svetni yoqinglar, — deydi murojaatchi onalar.Ko‘kdala tumani hokimligi mazkur holat o‘rganilganini ma’lum qildi.
Biroz avval chiroq o‘chgani aytilgan tug‘uruq bo‘limiga tuman hokimi boshchiligidagi ishchi guruh borib, vaziyatni o‘rgandi.Qo‘shimcha qilinishicha, tug‘uruqxonadagi mavjud sakkiz nafar chaqaloqning yetti nafari tug‘ilganiga uch kundan ortiq muddat bo‘lgani sababli uyiga javob berilgan, bir nafari esa markaziy shifoxonaning tug‘uruq bo‘limiga ko‘chirilgan.Ma’lum bo‘lishicha, 11-dekabr kuni tongi 03:30 atrofida elektr tarmog‘idagi kuchlanish sababli elektr ta’minotida uzilish kuzatilgan. Ammo tug‘uruqxonada isitish tizimi (otopleniya)da uzilish bo‘lmagan va ayni damda ishlab turibdi. Qashqadaryo Hududiy elektr tarmoqlari korxonasi xodimlarining tezkor harakatlari bilan elektr ta’minotidagi uzilishni bartaraf etish choralari ko‘rilmoqda, — deyiladi hokimlik axborotida.
Shuningdek, tumandagi boshqa hududlarda ushbu holat takrorlanmasligi uchun barcha tegishli chora-tadbirlar ko‘rilmoqda. O‘z vaqtida qo‘shimcha generator (dvijok)ni ishga tushirmay, muammoga sovuqqonlik bilan qaragan tuman tibbiyot birlashmasi xodimlariga intizomiy chora ko‘rildi, — deyiladi hokimlik munosabatida.
Izoh (0)