O‘zbekistondagi mavjud metan gaz zapravkalaridagi turnaqator navbat, shuningdek ayni kunda yuzaga kelgan gaz taqchillik sabab benzin yonilg‘isiga talab ortmoqda. “Daryo” kuzatuvchilarining xabar berishicha, bu talab joylarda arzon benzin narxi oshishiga olib kelgan.
Bugun avvaliga Surxondaryo viloyatidagi zapravkada, so‘ngra respublika miqyosidagi 299 ta zapravkada benzin narxi o‘zboshimchalik bilan oshirilgani, shuningdek sifatsiz yonilg‘i sotilgani bois, ularga benzin yetkazib berish to‘xtatilgani xabar qilindi.
“Daryo” nashri kuzatuvchilari tadbirkorlarga chora qo‘llanilsa-da, ayrim hududlarda holat hamon yaxshilanmayotganini, o‘zboshimchalik davom etayotganini xabar berdi. Ta’kidlanishicha, Xorazm viloyatining barcha hududlarida, Surxondaryo viloyatining Termiz, Sherobod va Denov tumanidagi AYOQSHlarda, shuningdek, Qoraqalpog‘istonning Beruniy tumanidagi zapravkalarda AI-80 markali benzin 8000 so‘mdan sotilmoqda.
“Daryo” muxbirlar ham hududlarda bo‘lib, AI-80 markali arzon benzin narxlari bilan qiziqdi.
Toshkent shahri
Poytaxt Toshkentda eng arzon benzin — AI-80 markali yonilg‘i 6800 so‘mdan 7100 so‘mgacha bo‘lgan narxlarda sotilayotganiga guvoh bo‘ldik.
“O‘zbekneftgaz”ga qarashli barcha zapravkalarda AI-80 markali benzin mavjud va narx 6800 so‘mdan oshmagan. Tadbirkorlarga qarashli zapravkalarda esa aynan shu markali benzin 6950 so‘mdan 7100 so‘mgacha bo‘lgan narxni tashkil qilmoqda.
Toshkentda kechki payt aksariyat zapravkalarda AI-80 markali benzinni topib bo‘lmay qolyapti. Borsak, tugagan deya qimmat markali benzinni tavsiya qilishadi. Haydovchilarning ko‘pchiligi zapravkalar AI-80 markali benzinni kechki payt qimmat markali benzin deb sotishadi deyishadi. Ba’zan shu gaplarda ham jon bormikin deb o‘ylab qolasan kishi, — deydi “Daryo” muxbiriga bu haqda gapirgan haydovchi.
Namangan
Namanganda avtomobillarga gaz quyish shoxobchalarining aksariyati ishlamayapti, faoliyat ko‘rsatayotganlarida esa tong bo‘lmay uzundan-uzoq navbat yuzaga kelib, hech qancha vaqt o‘tmay yopilmoqda. Shu tufayli viloyatdagi benzin quyish shoxobchalarida ham navbatlar kuzatilmoqda.
Turnaqator navbatlar ayniqsa “O‘zbekneftgaz” shoxobchalarida ko‘p, chunki ularda AI-80 markali benzin 6800 so‘mdan sotilmoqda. Xususiy benzin quyish shoxobchalarida esa bu narx 7500 so‘mni tashkil etmoqda. Ammo ularda ham navbatlar borligiga guvoh bo‘lish mumkin, chunki ko‘pchilikda xususiylarda benzin sifatliroq bo‘lishi haqidagi tushuncha shakllangan.
“O‘zbekneftgaz” shoxobchalarida A-92 markali benzin 11 ming, xususiylarda esa 10 500 so‘mdan iborat. Qiziq tomoni, shu markali benzin quymoqchi bo‘lgan haydovchilar uchun navbat yo‘q.
Qashqadaryo
“Daryo”ning Qashqadaryo viloyatidagi muxbiri Murodjon Amirovning ma’lumot berishicha, viloyat markazi Qarshi shahridagi “O‘zbekneftgaz”ga qarashli benzin quyish shoxobchalarida AI-80 markali benzin 6800 so‘mdan sotilmoqda.
Bu markadagi benzin tadbirkorlarga qarashli benzin zapravkalarida ham 6800 so‘mdan 7000 so‘mgacha bo‘lgan narxda sotilmoqda, — deydi u.Muxbirning qo‘shimcha qilishicha, viloyatda “O‘zbekneftgaz”ga qarashli benzin quyish shoxobchalari Qarshi shahri va Shahrisabz shahrida joylashgan bo‘lib, aynan shu shoxobchalarda benzinga navbat kuzatiladi. Shuningdek, “O‘zbekneftgaz”ga qarashli Qarshi shahridagi benzin quyish shoxobchalarida AI-91 markali benzin yo‘q. AI-92 benzini 9500 so‘m, AI-95 benzini esa 10500 so‘mdan sotilmoqda”.
Metan gazlardagi qator navbatlar oqibatida benzinda yurishga majbur bo‘lyapmiz. Men AI-80 benzinidan xarid qilaman. Hozircha narxlar oshmagan, ammo oshib ketadigan bo‘lsa, ko‘pchilikning cho‘ntagi ko‘tarmaydi, — deydi muxbir bilan suhbatlashgan haydovchilardan biri.Qoraqalpog‘iston
“Daryo”ning Qoraqalpog‘istondagi muxbiri Shuhrat Saidahmadovning ma’lumot berishicha, hudud markazi Nukusda AI-80 markali benzin 7000 so’mdan, AI-92 markali benzin 12 ming so‘mdan sotilmoqda.
Shoxobchalarda kunning ikkinchi yarmiga kelib navbatlar ko‘paymoqda. Ba’zi shoxobchalarda AI-80 markali benzin tugab qolgan vaziyatlar bo‘lsa, ba’zilarida AI-91 va AI-92 markali benzinlar tanqisligi kuzatilmoqda, — deydi Shuhrat Saidahmadov.
Farg‘ona
“Daryo”ning Farg‘ona viloyatidagi vakili Azizjon Ermatovning xabar berishicha, viloyatda nafaqat “O‘zbekneftgaz” xususiy zapravkalarda ham AI-80 markazi benzin narxi 6800 so‘m etib belgilangan.
Qo‘shimcha qilinishicha, 9-dekabr kunidan boshlab Farg‘ona viloyatidagi metan gaz quyish shoxobchalari faoliyati qayta tiklangan. Biroq gaz bosimining pastligi va shoxobchalar ish vaqtining cheklangani, aholi va ijtimoiy soha obyektlarini tabiiy gaz bilan ta’minlash maqsadida soat 11:00—12:00 larda shaxobchalar faoliyatining to‘xtatilishi tufayli navbatlar kuzatilmoqda.
Shu sababdan, aksariyat haydovchilar muqobil yonilg‘i — benzindan foydalanmoqda. Farg‘ona viloyatidagi barcha avtomobillarga yonilg‘i quyish shoxobchalarida AI-80 markali benzin 6800 so‘mdan sotilmoqda. “O‘zbekneftgaz” tarkibidagi va xususiy AYOQSHlarda ushbu markadagi benzin narxi bir xil. Hududdagi avtomobillarga yonilg‘i quyish shoxobchalarida ortiqcha navbatlar va benzin tanqisligi kuzatilmayapti, — deydi “Daryo” muxbiri.
Foto: “Daryo” / Azizjon Ermatov
“O‘zneftgazinspeksiya”ning Farg‘ona viloyati hududiy bo‘limi xodimlari tomonidan viloyatdagi 218 ta avtomobillarga yonilg‘i quyish shoxobchasida benzin narxining asossiz oshib ketishining oldini olish maqsadida tushuntirish-targ‘ibot ishlari olib borilmoqda.
Viloyatdagi AYOQSHlarda AI-92 benzin 8000—9000 so‘mdan, AI-95 benzin 10 ming so‘mdan sotilmoqda.
Izoh (0)