AOKAda 9-dekabr kuni o‘tkazilgan brifingda Iste’molchilar huquqlarini himoya qilish agentligi axborot xizmati rahbari Mohruxsor Tog‘ayeva noto‘g‘ri reklamalarning oldini olish bo‘yicha amalga oshirilgan ishlar yuzasidan ma’lumot berdi.
Agentlik tomonidan barcha manbalar orqali joylashtirilgan reklamalarning qonunchilik talablariga mosligi yuzasidan doimiy o‘rganish va kuzatuvlar amalga oshiriladi. Xususan, 2022-yilning o‘tgan davrida 39 mingdan ortiq o‘rganish o‘tkazilgan bo‘lib, shundan 13 mingga yaqin holatda turli kamchiliklar aniqlangan va ularni tezkor bartaraf etish choralari ko‘rildi.
9-sentabr kuni yangi tahrirdagi “Reklama to‘g‘risida”gi qonun kuchga kirgan bo‘lib, unga bir qator yangi tushunchalar, normalar belgilangan va reklamaga qo‘yilgan talablar kuchaytirildi. Xususan, qonunda dori vositalari va biologik faol qo‘shimchalar reklamasida taniqli shaxslar, tibbiyot xodimlari ishtirokidan foydalanish man etiladi. Shuningdek, dori vositasini noyob, eng samarali, eng xavfsiz deb taqdim etish mumkin emas.
Biologik faol qo‘shimchalar reklamasida esa ularning davolash xususiyatlariga egaligi haqida ma’lumot berish, fuqarolarning minnatdorchiligini ko‘rsatish va ularda dori vositalariga nisbatan afzalligi haqidagi taassurotni yuzaga keltirish taqiqlangan. Agentlik tomonidan mazkur yo‘nalishda o‘rganilgan reklamalarning 647 tasida kamchiliklar aniqlandi va bartaraf etildi.
Izoh (0)