Erondagi namoyishlar chog‘ida “Basij” harbiylashtirilgan kuchlari a’zosi Ruholloh Ajamiani o‘ldirganlikda ayblanib, besh kishi o‘limga hukm qilindi. Bu haqda Al-Arabia xabar berdi.
Ma’lum qilinishicha, yana 11 kishi, jumladan, uch nafar bola Ajamianning o‘limi sababli uzoq muddatga qamaladi. Sud qarori yakuniy emas va uning ustidan shikoyat qilish mumkin. Ajamian noyabr oyida Karaj shahrida o‘ldirilgan. Holat yuzasidan 15 kishidan iborat guruhga ayblov qo‘yilgan.
“Basij” Eron Islom inqilobi qo‘riqchilari korpusining harbiylashtirilgan bo‘limi hisoblanadi. Eron odatda tartibsizliklar yuzaga kelganida “Basij” a’zolarini mamlakat bo‘ylab joylashtiradi.
Eronda 17-sentabrdan beri davom etayotgan namoyishlarda 18 000 ga yaqin odam hibsga olindi. Hozirgacha olti kishi o‘limga hukm qilingani ma’lum. 469 nafar namoyishchi va 61 nafar xavfsizlik kuchlari a’zosi esa o‘ldirilgan.
Mavzuga doir:
Izoh (0)