Xitoy rahbari Si Szinpin 7-dekabr kuni Saudiya Arabistoniga tashrif buyuradi. Bu haqda CNN xabar berdi.
Ma’lum qilinishicha, tashrif AQSH va ikki davlat o‘rtasidagi keskinlik fonida bo‘lib o‘tadi. Si Szinpinning Arabiston poytaxti Ar-Riyodga safari doirasida Xitoy—Arab sammiti bo‘lib o‘tadi, unda 14 arab davlati rahbarlari ishtirok etishi kutilmoqda. Ikki kunlik tashrif davomida Xitoy—GCC konferensiyasi ham bo‘lib o‘tishi rejalashtirilgan.
Xitoy rahbari AQSHning Yaqin Sharqdagi eng yirik ittifoqchi davlatiga tashrifi haqidagi mish-mishlar bir necha oydan beri tarqalib kelmoqda. Shunga qaramay, bu Saudiya Arabistoni va Xitoy hukumatlari tomonidan tasdiqlanmagan. Ta’kidlanishicha, sammit doirasida iqtisod va hamkorlik istiqbollari muhokama qilinadi. Si Szinpin tashrifi Arab—Xitoy munosabatlari uchun “muhim bosqich” deb baholanmoqda.
Ma’lumot o‘rnida, Saudiya Arabistoni Xitoydan qurol sotib olish bo‘yicha 4 mlrd dollarlik bitim imzolagan. Saudiya qirolligi Pekindan 300 dona CH4 dronlari, TB001 dronlarini yig‘ish liniyasi, kemaga qarshi YJ-21e gipertovushli raketalari va dronlarni tutib qoluvchi Silent Hunter lazerli tizimini oladi.
Saudiya Arabistoni qurollanishda AQSHga qaramlikni kamaytirishga harakat qilmoqda. Shu bilan birga, Xitoy Saudiya va Eron o‘rtasidagi ziddiyatda betaraflik saqlab kelayotgan edi. Ushbu bitimlar XXRning pozitsiyasiga ta’sir ko‘rsatishi mumkin.
Izoh (0)