Эрондаги намойишлар чоғида «Басиж» ҳарбийлаштирилган кучлари аъзоси Руҳоллоҳ Ажамиани ўлдирганликда айбланиб, беш киши ўлимга ҳукм қилинди. Бу ҳақда Al-Arabia хабар берди.
Маълум қилинишича, яна 11 киши, жумладан, уч нафар бола Ажамианнинг ўлими сабабли узоқ муддатга қамалади. Суд қарори якуний эмас ва унинг устидан шикоят қилиш мумкин. Ажамиан ноябрь ойида Караж шаҳрида ўлдирилган. Ҳолат юзасидан 15 кишидан иборат гуруҳга айблов қўйилган.
«Басиж» Эрон Ислом инқилоби қўриқчилари корпусининг ҳарбийлаштирилган бўлими ҳисобланади. Эрон одатда тартибсизликлар юзага келганида «Басиж» аъзоларини мамлакат бўйлаб жойлаштиради.
Эронда 17 сентябрдан бери давом этаётган намойишларда 18 000 га яқин одам ҳибсга олинди. Ҳозиргача олти киши ўлимга ҳукм қилингани маълум. 469 нафар намойишчи ва 61 нафар хавфсизлик кучлари аъзоси эса ўлдирилган.
Мавзуга доир:
Изоҳ (0)