Ukraina 2023-yilda budjetning deyarli yarmini mudofaa uchun ajratadi

2023-yilda Ukraina davlat budjetidan mudofaa va xavfsizlik sektoriga mablag‘larning qariyb yarmi (1 trillion 136 milliard grivna) ajratiladi, yana 35 foizi (800 milliard grivnadan ziyod) esa ijtimoiy himoya dasturiga — pensiyalar, subsidiyalar, nafaqalar tibbiyot va ta’limga xarajatlarga yo‘naltiriladi. Bu haqda Ukraina bosh vaziri Denis Shmigal hukumat majlisida e’lon qildi, deb yozadi “RBK”.

Mudofaa sektori uchun xarajatlarga harbiylarning maoshlari, armiya ta’minoti, texnika va qurol-yarog‘ ta’miri va xaridlari hamda boshqalar kiradi, deya aniqlashtirdi u. Ukraina hukumati rahbariga ko‘ra, o‘tgan yil bilan taqqoslaganda, xavfsizlik va mudofaa uchun rejalashtirilgan xarajatlar to‘rt barobardan ko‘proq oshgan.

Kelasi yil uchun davlat budjeti loyihasi doirasida Ukraina hukumati kamida 19 milliard grivna hajmida Jangovar harakatlar oqibatlarini bartaraf etish fondini yaratishga qaror qildi. Musodara etilgan Rossiya aktivlari va xalqaro ko‘mak ham shunga yo‘naltiriladi. SHuningdek, mintaqalarga jangovar harakatlar bilan bog‘liq xarajatlarni qoplash uchun 24 milliard grivna miqdorida qo‘shimcha dotatsiya ko‘zda tutilgan.

Qolgan barcha xarajatlar qisqartiriladi. Mansabdorlar kamaytiriladi hamda ularning maosh va mukofot pullari kesiladi; kuch tuzilmalaridan tashqari hukumat organlariga xarajatlar 2022-yilga nisbatan 11,6 milliard grivnaga kamayadi.

Bosh vazir so‘zlariga ko‘ra, 2023-yilda Ukrainaning daromadi 1,28 trillion grivnaga teng bo‘ladi, xarajatlar esa 2,57 trillion grivna hajmida rejalashtirilgan, har oylik budjet tanqisligi 3 milliard dollardan oshadi.