Rossiya Ukrainada urush boshlanganidan keyin G‘arb mamlakatlari tomonidan kiritilgan sanksiyalarga qaramay, qanotli raketalar ishlab chiqarishda davom etmoqda. Conflict Armament Research (CAR — butun dunyo bo‘ylab qurolli nizolar chog‘ida qurol yetkazib berilishi haqida ma’lumotlar to‘playdigan tahlilchilar guruhi) tahlilchilari shunday xulosaga keldi.
Tadqiqotchilar Rossiya qo‘shinlari 23-noyabr kuni Ukrainaga yoppasiga zarba berish chog‘ida Kiyevga uchirgan raketalar bo‘laklarini yig‘ib olib, o‘rganib chiqdi. CAR guruhi 2022-yil yozida va kuzida ishlab chiqarilgan ikkita X-101 qanotli raketalari parchalarini aniqladi. Bo‘laklarda topilgan kod shundan darak bermoqda.
Bundan avvalgi tadqiqotlarida CAR tahlilchilari Rossiya ilg‘or qurol-yarog‘larining deyarli barchasi xorijda ishlab chiqarilgan tarkibiy qismlar hamda Amerika yoki Yevropa kompaniyalari texnologiyalaridan foydalangan holda yaratilganini aniqlagandi.
Ma’ruza mualliflaridan biri taxmin qilishicha, Rossiya raketalar uchun tarkibiy qismlarni sanksiyalarni aylanib o‘tgan holda sotib olish usulini topgan yoki bo‘lmasa, u urush boshlanishidan avval bu tarkibiy qismlarning katta zaxirasini yig‘ib qo‘ygan.
AQSH fikricha, Rossiya urushni davom ettirish uchun o‘q-dorilar tanqisligini boshdan kechirmoqda. Amerikalik harbiy amaldor The New York Times’ga ma’lum qilishicha, Moskva qurol-yarog‘larning ham eski, ham yangi turlarini qo‘llashi mumkin. Tahlilchilar ma’lumotlariga ko‘ra, Rossiya hukumati o‘q-dorilar yetishmovchiligini qoplash uchun mudofaa korxonalarida ish soatlarini uzaytirgan bo‘lishi mumkin.
Rossiya Ukrainaga bostirib kirgach, G‘arb mamlakatlari RFga nisbatan bir qator cheklovlar kiritdi, shu jumladan, mamlakatga qurol ishlab chiqarishda foydalanilishi mumkin bo‘lgan tarkibiy qismlar va texnologiyalarni yetkazib berishni taqiqladi. Bahordan buyon OAVlar Rossiya sanksiyalar fonida urushni davom ettirish uchun o‘q-dorilar yetishmovchiligiga duch kelgan bo‘lishi mumkinligi haqida vaqti-vaqti bilan xabar berib kelmoqda.
Izoh (0)