5-dekabr kuni Rossiyaning Saratov va Ryazan viloyatlarida aerodromlarga hujum qilgan dronlar Ukraina hududidan uchirilgan. Bu haqda The New York Times ukrainalik yuqori mansabli amaldorga tayanib xabar berdi.
Hujumlardan kamida bittasini Ukraina maxsus topshiriqli bo‘linmalari guruhi muvofiqlashtirgan, ular Rossiya bazasi yaqinida turib, uchuvchisiz uchar qurilmalar nishonga borib tegishida yordam bergan. Shu bilan birga, ular Rossiya hududiga qanday kirgani tushunarsiz, deb yozadi gazeta.
Aerodromlardagi hodisalar shundan guvohlik beradiki, Kiyev frontdan ancha ichkarida joylashgan Rossiya harbiy bazalariga hujum qilishga tayyor, deyiladi xabarda. Bundan tashqari, ta’kidlanishicha, bu hujumlar Ukrainaning katta masofalarga zarbalar berish qobiliyatini ko‘rsatadi.
Gazeta bu operatsiyani Ukraina armiyasi uchun urush boshidan buyon “eng dadili” deb atadi. O‘z navbatida, Britaniya razvedkasi kunlik ma’lumotnomasida yozishicha, hodisani Rossiyaning o‘z harbiy obyektlari qo‘riqlanishini tashkil qilishdagi strategik jihatdan eng muhim muvaffaqiyatsizliklaridan biri deb hisoblash mumkin.
5-dekabr kuni ertalab OAVlar Saratov viloyatidagi Engels shahri yaqinida joylashgan aerodromga uchuvchisiz uchar qurilma kelib qulagani haqida xabar berdi. Oqibatda ikki harbiy xizmatchi yaralangan, ikkita Tu-95 bombardimonchi-raketa tashuvchi samolyot zarar ko‘rgan. Bu bilan deyarli bir vaqtda Ryazan yaqinidagi aerodromda benzovoz (benzin tashuvchi sisternali avtomobil) portlab ketgani ma’lum bo‘ldi, natijada, OAVlarga ko‘ra, samolyotlardan biriga zarar yetgan. “TASS” manbalari uch kishi halok bo‘lib, besh kishi jabrlanganini ma’lum qildi.
Shu kuniyoq Rossiya qo‘shinlari Ukraina hududida muhim infratuzilma obyektlarini yoppasiga raketalar bilan o‘qqa tutdi, kechqurun esa Rossiya Mudofaa vazirligi aerodromlarga Ukraina hujum qilganini tasdiqladi. Ukraina shu tariqa uzoq masofali Rossiya samolyotlarini izdan chiqarishga uringan, dedi muassasa.
Vazirlik versiyasiga ko‘ra, Ukraina dronlari Rossiya havo hujumiga qarshi mudofaa tizimi kuchlari tomonidan tutib qolingan. Qurilmalar yerga qulashi va portlashi natijasida ikkita samolyotga “kichik” zarar yetgan. Idora Rossiya harbiy xizmatchilari orasida uch kishi halok bo‘lib, to‘rt kishi yaralanganini tasdiqladi.
Kiyev hujumlar uchun javobgarlikni rasman o‘z zimmasiga olganicha yo‘q. Rossiya aerodromlaridagi portlashlar haqidagi xabarlardan keyin Ukraina prezidenti ofisi rahbari maslahatchisi Mixail Podolyak boshqa mamlakatlarning havo hududlariga “noma’lum uchar jismlar” uchirish oqibatlari haqida tvit yozdi.
Izoh (0)