АҚШ Конгресси сенати мамлакатнинг 2023 йил учун мудофаа бюджетини келишиб олди, деб ёзади «Коммерсантъ». Аввалроқ у Вакиллар палатаси томонидан тасдиқланган эди.
Бюджет 847,3 миллиард долларни ташкил қилади, шунинг 800 миллион доллари Украинага ҳарбий ёрдам учун йўналтирилади. Мудофаа бюджетининг ушбу лойиҳаси АҚШ тарихидаги энг йиригига айланиши мумкин.
«Украина ва НАТОга кўмак оширилади. Лойиҳа Украинага хавфсизлик соҳасида ёрдам ташаббусини кенгайтиради ва модификация қилади ҳамда 2023-молия йилида қўшимча 800 миллион доллар ёрдам ажратилишини тасдиқлайди», — дейилади бюджет лойиҳасида.
Бундан ташқари, бюджет лойиҳаси Россия билан ҳарбий ҳамкорликка қўйилган тақиқни беш йилга узайтиради. Келишиб олинганидан кейин ҳужжат имзолаш учун президент Жо Байденга йўналтирилади.
Украина президенти Владимир Зеленский АҚШ мудофаа бюджети Киевга авиация соҳасида ҳарбий кўмакни кўзда тутишини айтганди.
АҚШнинг 2022-молия йили учун мудофаа бюджети 778 миллиард долларлик сарф-харажатларни кўзда тутган эди. 4 миллиард доллар Россияни Европада тийиб туриш ва Украинага ёрдамни оширишга қаратилган ташаббусларга ажратилган эди.
Изоҳ (0)