Estoniya hukumati Amerikaning Lockheed Martin korporatsiyasidan HIMARS baravar o‘t ochish reaktiv tizimlari va ular uchun o‘q-dorilarni sotib oladi, deb yozadi “Kommersant”.
Shartnoma summasi 200 million dollarni tashkil qildi. Yetkazib berish haqidagi bitim Estoniya Davlat mudofaa investitsiyalari markazi bosh direktori Magnus-Valdemar Saar tomonidan imzolandi.
Markazning qurol-yarog‘lar bo‘limi boshlig‘i Ramil Lipp aniqlik kiritishicha, shartnoma o‘q otish masofasi 70 dan 300 kilometrgacha bo‘lgan har xil turdagi raketalarni yetkazib berishni ko‘zda tutadi. Tizimlar 2024-yilda yetkazib berila boshlaydi. Shartnomaga, shuningdek, qurolni ishlatishga o‘rgatish va logistika masalalarini hal qilish xizmatlari kiradi.
10-noyabr kuni AQSH Davlat departamenti Litvaga 495 million dollarlik HIMARS tizimlarini sotish uchun ruxsat berdi. Litva ularni 2025 va 2026-yillarda qabul qilib oladi. Latviya hukumati 2025-yilgacha ham AQSHdan oltita HIMARS tizimlarini sotib olishni rejalashtirmoqda.
Latviya Mudofaa vazirligi davlat kotibi Yanis Garisons aytishicha, bu tizimlarni sotib olish Boltiq mamlakatlarining birgalikdagi qarori va loyihasi hisoblanadi.
Izoh (0)