Эстония ҳукумати Американинг Lockheed Martin корпорациясидан HIMARS баравар ўт очиш реактив тизимлари ва улар учун ўқ-дориларни сотиб олади, деб ёзади «Коммерсантъ».
Шартнома суммаси 200 миллион долларни ташкил қилди. Етказиб бериш ҳақидаги битим Эстония Давлат мудофаа инвестициялари маркази бош директори Магнус-Вальдемар Саар томонидан имзоланди.
Марказнинг қурол-яроғлар бўлими бошлиғи Рамил Липп аниқлик киритишича, шартнома ўқ отиш масофаси 70 дан 300 километргача бўлган ҳар хил турдаги ракеталарни етказиб беришни кўзда тутади. Тизимлар 2024 йилда етказиб берила бошлайди. Шартномага, шунингдек, қуролни ишлатишга ўргатиш ва логистика масалаларини ҳал қилиш хизматлари киради.
10 ноябрь куни АҚШ Давлат департаменти Литвага 495 миллион долларлик HIMARS тизимларини сотиш учун рухсат берди. Литва уларни 2025 ва 2026 йилларда қабул қилиб олади. Латвия ҳукумати 2025 йилгача ҳам АҚШдан олтита HIMARS тизимларини сотиб олишни режалаштирмоқда.
Латвия Мудофаа вазирлиги давлат котиби Янис Гарисонс айтишича, бу тизимларни сотиб олиш Болтиқ мамлакатларининг биргаликдаги қарори ва лойиҳаси ҳисобланади.
Изоҳ (0)