Jahon sog‘liqni saqlash tashkiloti rahbari Tedros Gebreyesus ma’lum qilishicha, dunyo aholisining kamida 90 foizida COVID-19 ga nisbatan immunitet hosil bo‘lgan. Uning so‘zlariga ko‘ra, bu odamlarning vaksina olgani yoki koronavirusni avvalroq boshdan kechirgani natijasida yuz bergan.
“Pandemiyaning favqulodda bosqichi tugadi, deyishga tobora yaqinlashyapmiz. Ammo hali yakunga yetib kelmadik”, — dedi JSST rahbari.
Tashkilot bosh direktori so‘zlariga ko‘ra, 21—27-noyabr oralig‘idagi davrda COVID-19 dan 8,5 mingdan ziyod kishi vafot etgan.
“Pandemiya boshlanganidan keyin uch yil o‘tib, qo‘l ostimizda infeksiyaning oldini olish va hayotlarni qutqarish uchun shuncha ko‘p vositalar turganida, bu qabul qilib bo‘lmaydigan holatdir”, — dedi Tedros Gebreyesus.
Shu bilan birga, uning ta’kidlashicha, koronavirusdan o‘lim holatlarining haftalik ko‘rsatkichi so‘nggi besh hafta ichida biroz pasaygan.
JSST rahbari, shuningdek, aniqlik kiritishicha, bugungi kunda “omikron” shtammining 500 dan ortiq variantlari mavjud.
“‘Omikron’ shtammi paydo bo‘lganidan beri COVID-19 mutatsiyaga uchrashda daavom etdi. Bugungi kunda uning 500 dan ziyod turlari aylanib yuribdi. Ularning barchasi juda yuqumli, — dedi Gebreyesus. — Epidemiologik nazorat, testdan o‘tkazish va vaksinatsiyadagi kamchiliklar yangi, xavotir uyg‘otuvchi va o‘lim darajasi ancha yuqori bo‘lgan variant yuzaga kelishi uchun mukammal sharoitlar yaratishda davom etmoqda”.
Izoh (0)