Gretsiyaning Aleksandrupolis port shahrida Amerika tanklari va zirhli mashinalari ortilgan poyezd relsdan chiqib ketdi. Gretsiyaning “902.gr” portali ma’lumotlariga ko‘ra, qurol-yarog‘larni portdan NATOning Rossiya bilan chegarasiga olib borish rejalashtirilgandi.
Hodisadan keyin ko‘p o‘tmay, poyezd izdan chiqib ketgan temir yo‘lda mahalliy aholi yig‘ilib, miting o‘tkazgan va Amerika quroli ularning shahri orqali olib o‘tishni to‘xtatishni talab qilgan.
Miting videosida port shahar aholisi harbiy texnika ortilgan poyezd fonida plakatlar ko‘targan holda turganini ko‘rish mumkin. Poyezd vagonlari esa allaqachon yana relsda turibdi. “Aleksandrupolis — xalq porti, u imperialistlar tayanchi emas”, — dedi miting ishtirokchilari.
Ularning fikricha, qurol-yarog‘ning olib o‘tilishi ularning xavfsizligiga tahdid soladi, bugungi voqea esa buning isbotidir.
“Evros24.gr” portali ma’lumotlariga qaraganda, poyezd 2-dekabr kuni ertalab Aleksandrupolisning Fransiya vokzali yaqinida relsdan chiqib ketgan. U kichik tezlikda harakatlangan va yonboshiga og‘ib qolgan. Favqulodda xizmatlar ko‘tarish kranlarini jalb qilib, vagonlarni relsga qaytarib qo‘ygan.
Izoh (0)