Tojikiston-Qirg‘iziston chegarasida navbatdagi ko‘ngilsiz hodisa yuz berdi, oqibatda Somoniyon qishlog‘i fuqarosi jabrlandi, deb xabar bermoqda Asia Plus Tojikistonning Isfara shahar raisi matbuot kotibi Zubaydullo Shomadovga tayanib.
Uning ma’lum qilishicha, 3-dekabr kuni taxminan 10:00 da Qirg‘iziston fuqarolari Tojikistonning Chorkuh jamoati Somoniyon qishlog‘i fuqarosini armatura bilan do‘pposlagan. Shundan keyin qirg‘izistonlik chegarachilar Tojikiston tomoniga qarata bir necha marta o‘q uzgan.
Jabrlanuvchi kasalxonaga yotqizilgan.
“Hodisa yuz bergan holatni va uning sabablarini aniqlashtirish uchun ayni paytda ikki mamlakat chegara xizmatlari darajasida uchrashuv o‘tkazilmoqda”, — dedi Shomadov.
Qirg‘iziston Davlat milliy xavfsizlik qo‘mitasi Chegara xizmati talqiniga ko‘ra, janjal “Qirg‘iziston fuqarosi M.N. va Tojikiston fuqarolari o‘rtasidagi dahanaki jang”dan keyin boshlangan.
“Tojikiston fuqarolari Qirg‘iziston fuqarosiga qarata haqoratli gaplarni ayta boshlagan. Ular o‘rtasida janjal boshlanib, o‘zaro toshbo‘ronga aylanib ketgan. Nizo kuchayib ketishiga yo‘l qo‘ymaslik uchun Qirg‘iziston fuqarosi ov qurolidan havoga qarata uch marta ogohlantiruvchi o‘q uzgan”, — deya ma’lum qildi chegara xizmati.
Izoh (0)