Ukraina elchilariga haqiqiy yoki qalbaki portlovchi qurilmalar yoki bo‘lmasa, sigir, cho‘chqa ko‘zlari va jonivorlarning boshqa a’zolari solingan 17 ta anonim pochta jo‘natmalari yuborilgan, bu qo‘rqitish kampaniyasidir, dedi Ukraina tashqi ishlar vaziri Dmitriy Kuleba CNN’ga bergan intervyusida.
“Hammasi Ukrainaning Ispaniyadagi elchixonasi yaqinida yuz bergan portlashdan boshlandi. Lekin bu portlashdan keyingi hodisalar yanada g‘ayritabiiyroq va aytish joiz bo‘lsa, nosog‘lomroqdir”, — dedi vazir.
Kuleba ushbu jo‘natmalar “biz xalqaro maydonda Rossiya uchun yaratgan o‘sha diplomatik dahshat”ga javob bo‘lganini taxmin qildi. Voqealar uchun yoki Moskva, yoki unga moyillik bildirib, “qo‘rquv urug‘ini sochishga intilayotganlar” mas’ul, deb hisoblaydi u.
Keyinroq Kuleba diplomatlarga yana bitta posilka kelganini, endi ularning soni 18 taga yetganini aytdi. Vazir aniqlik kiritishicha, “ayni paytgacha bizga nisbatan 12 ta mamlakatda 18 marta tahdid holati yuz berdi, bular Vengriya, Niderlandiya, Polsha, Xorvatiya, Italiya, Avstriya, Chexiya, Vatikan, Fransiyadagi voqealar, Qozog‘istonda mina qo‘yilgani haqidagi xabar va AQSHdagi shubhali xatdir”.
30-noyabr kuni Ukrainaning Madriddagi elchixonasida portlash sodir bo‘ldi, oqibatda xavfsizlik xizmati xodimi jarohatlandi. Portlovchi qurilma elchi Sergey Pogorelsevga yo‘llangan xat ichida bo‘lgan. U portlovchi qurilmadan iborat paket yuborilishi ortida Rossiya turganini taxmin qildi.
Bu hodisadan keyin Ispaniyada so‘nggi bir hafta ichida bombalar solingan xatlar bosh vazir Pedro Sanchesga, mamlakat Mudofaa vazirligiga, AQSHning Madriddagi elchixonasiga, Torrexon-de-Ardos shahridagi aviabazaga, shuningde, Kiyevga qurol yetkazib beruvchi Instalaza kompaniyasiga yuborilgani ma’lum bo‘ldi.
Bunday xatlar Ukrainaning Madriddagi elchixonasidan tashqari, chet mamlakatlardagi yana ikkita vakolatxonasiga kelib tushgan. Voqealar 30-noyabr va 1-dekabr kunlari yuz bergan. Kuleba Ukrainaning uchta elchixonasiga tahdidlar va qandaydir qizil suyuqlikdan iborat bo‘lgan xatlar yuborilganini aytgandi. “Xatlarda portlovchi qurilma emas, boshqacha modda bo‘lgan… Shunday deylik: ushbu konvertlar ichida Ukrainaga nisbatan ramziy tahdid bo‘lgan. Faqat shuni aytishim mumkinki, konvertlarning barchasi qabul qilingan vaqtda qizil suyuqlik bilan shimdirilgan bo‘lgan”, — dedi u “Rada” telekanali efirida.
Izoh (0)