Davlat xavfsizlik xizmati kuchli ta’sir qiluvchi moddalar savdosi bilan shug‘ullangan 7 nafar shaxsga sud hukmi o‘qilganini ma’lum qildi.
Qayd etilishicha, Davlat xavfsizlik xizmati xodimlari tomonidan bojxona organlari bilan hamkorlikda Toshkent shahrining Sergeli tumanida tezkor tadbir o‘tkazilgan. Unda Shayxontohur tumanida yashovchi R.P. (1985-yilda tug‘ilgan) 56 dona “Regapen” va 10 dona “Tropikamid” kuchli ta’sir qiluvchi dori vositalarini sotayotgan vaqtda qo‘lga olingan.
Shuningdek, R.P.ning Cobalt avtomashinasi tegishli tartibda tekshirilganda, 2858 dona “Regapen” va 691 dona “Tropikamid” dori vositalari borligi ham aniqlangan.
Jinoyat ishlari bo‘yicha Sergeli tumani sudi tomonidan u Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) 3-qismi bilan aybdor deb topilib, 8 yil muddatga ozodlikdan mahrum qilingan.
Boshqa holatda esa Toshkent viloyatining O‘rta Chirchiq tumanida yashovchi I.I. (1975-yilda tug‘ilgan)ning xonadoni ko‘zdan kechirilgan. Natijada 77 dona “Tropikamid”, 13 dona “Regapen” va 6 dona “Selofen” kuchli ta’sir qiluvchi dori vositalari borligi aniqlangan.
Jinoyat ishlari bo‘yicha Toshkent viloyati sudi tomonidan I.I. Jinoyat kodeksining 251-1-moddasi bilan aybdor deb topilib, unga 3 yil muddatga ozodlikdan mahrum qilish jazosi tayinlangan.
Toshkent viloyatidagi “Chinor” YPX maskanida Andijon viloyatining Paxtaobod tumanida yashovchi B.A. (1982-yilda tug‘ilgan) boshqaruvidagi Cobalt avtomashinasi to‘xtatilib tekshirilgan. Natijada unda 5572 dona “Regapen” kuchli ta’sir qiluvchi dori vositalari borligi aniqlanib, protsessual tartibda rasmiylashtirib olingan. So‘ngra tezkor tadbir davom ettirilib, Sirdaryo viloyatining Yangiyer shahrida yashovchi M.Y. (1991-yilda tug‘ilgan) mazkur dori vositalarini Toshkent shahrida qabul qilib olgan vaqtda ushlangan.
Shuningdek, u dori vositalarining bir qismini Chilonzor tumanida yashovchi B.B.ga (1985-yilda tug‘ilgan) sotishi kerakligi ma’lum bo‘lib, u ham qo‘lga olingan.
Bundan tashqari, tegishli ko‘rsatmalar asosida jinoiy guruh yetakchilari — Toshkent shahrida yashovchi N.A. (1983-yilda tug‘ilgan) va Qo‘qon shahrida yashovchi R.M. (1996-yilda tug‘ilgan)lar ham ushlangan. R.M.ning yashash xonadoni ko‘zdan kechirilganda 3542 dona “Regapen” dori vositasi borligi aniqlangan.
Ta’kidlanishicha, ushbu kuchli ta’sir qiluvchi dori vositalari O‘zbekistonga Qirg‘iziston Respublikasidan kontrabanda yo‘li bilan olib kelingan.
Jinoyat ishlari bo‘yicha Ohangaron shahar sudi tomonidan R.M. va M.Y.ga nisbatan 5 yil, N.A.ga 3 yil muddatga ozodlikdan mahrum qilish jazosi tayinlangan. B.A. va B.B.larga esa 5 yil muddatga ozodlikdan mahrum qilish jazosi tayinlanib, Jinoyat kodeksining 72-moddasi qo‘llangan holda tayinlangan jazo shartli deb hisoblanib, ularga 2 yil sinov muddati belgilangan.
Izoh (0)