May oyida Samarqand viloyatida IIB xodimi pogonini o‘zi yulib, bunda yonidagi ayolni ayblagani aks etgan video tarqalgan edi. Tasvirlarda ichki ishlar xodimi bir ayolni qo‘lidan tortib, majburiy tartibda olib ketayotgani va bu jarayonda xodim pogonini o‘zi yulib olib, qasddan ayolni aybdor qilishga uringani ko‘ringan. Ushbu holatni videotasvirdan aniq ko‘rish mumkin.
Bugun, 1-dekabr kuni AOKAda bo‘lib o‘tgan matbuot anjumanida jurnalistlar tomonidan o‘z pogonini yulib olib, ayolni qasddan aybdor qilmoqchi bo‘lgan ichki ishlar xodimi tizimda ishlayotgani savol ostiga olindi. Bu haqda “Daryo” muxbiri xabar bermoqda.
Savolga IIV mas’ul xodimi, mayor Navro‘z Nabiyev javob berar ekan, pogonini o‘zi yulgan IIB xodimi tizimda ishlayotganini tasdiqladi.
“Holat yuzasidan prokuratura organlari tomonida jinoyat ishi qo‘zg‘atilgan. Ichki ishlar organi xodimi va fuqarolarning ko‘rgazmalarida o‘zaro zid ma‘lumotlar bo‘lganligi va tergov jarayonida aniqlangan boshqa ko‘rsatmalar va aniqlangan faktlarga asoslanib, ayolga nisbatan Jinoyat kodeksining 219-moddasi (hokimiyat vakili yoki fuqarolik burchini bajaruvchi shaxsga qarshilik ko‘rsatish) bilan jinoyat ishi qo‘zg‘atilib, bir yil axloq tuzatish ishlari tayinlangan”, — dedi Navro‘z Nabiyev.
Mas’ul xodimning qo‘shimcha qilishicha, Samarqand viloyat ichki ishlar boshqarmasi tomonidan o‘tkazilgan xizmat tekshiruvi natijasida xodimning xatti-harakatlariga baho berilib, prokuratura organi tomonidan huquqiy baho berishi bo‘yicha hujjat to‘liq yuborilgan. Natijada xodim o‘z ishida qolgan.
Bundan ko‘rinadiki, prokuratura IIB tomonidan o‘z xodimiga nisbatan o‘tkazilgan xizmat tekshiruvi natijalariga e’tiroz bildirmagan. Ya’ni o‘z pogonini yulib olgan xodimning xatti-harakatlari uning tizimda ishlashiga monelik qilmasligi qonunchilikda qayd etilgan bo‘lishi mumkin.
Anjumanda “Daryo” muxbiri mas’ullarga agar IIB xodimi o‘z pogonini qasddan yulib tashlasa, u tizimda ishlaydimi, degan savolni berdi.
Savolga IIV axborot xizmati rahbari Shohruh G‘iyosov javob berdi:
“Agar ichki ishlar xodimi pogonini qasddan yulib tashlasa, ichki ishlar tizimida ishlamaydi. Jinoiy jazo beriladi, u xodimning ruhiy holati tekshiriladi”, — dedi u.
Izoh (0)