Давлат хавфсизлик хизмати кучли таъсир қилувчи моддалар савдоси билан шуғулланган 7 нафар шахсга суд ҳукми ўқилганини маълум қилди.
Қайд этилишича, Давлат хавфсизлик хизмати ходимлари томонидан божхона органлари билан ҳамкорликда Тошкент шаҳрининг Сергели туманида тезкор тадбир ўтказилган. Унда Шайхонтоҳур туманида яшовчи Р.П. (1985 йилда туғилган) 56 дона «Регапен» ва 10 дона «Тропикамид» кучли таъсир қилувчи дори воситаларини сотаётган вақтда қўлга олинган.
Шунингдек, Р.П.нинг Cobalt автомашинаси тегишли тартибда текширилганда, 2858 дона «Регапен» ва 691 дона «Тропикамид» дори воситалари борлиги ҳам аниқланган.
Жиноят ишлари бўйича Сергели тумани суди томонидан у Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) 3-қисми билан айбдор деб топилиб, 8 йил муддатга озодликдан маҳрум қилинган.
Бошқа ҳолатда эса Тошкент вилоятининг Ўрта Чирчиқ туманида яшовчи I.И. (1975 йилда туғилган)нинг хонадони кўздан кечирилган. Натижада 77 дона «Тропикамид», 13 дона «Регапен» ва 6 дона «Селофен» кучли таъсир қилувчи дори воситалари борлиги аниқланган.
Жиноят ишлари бўйича Тошкент вилояти суди томонидан I.И. Жиноят кодексининг 251-1-моддаси билан айбдор деб топилиб, унга 3 йил муддатга озодликдан маҳрум қилиш жазоси тайинланган.
Тошкент вилоятидаги «Чинор» ЙПХ масканида Андижон вилоятининг Пахтаобод туманида яшовчи Б.А. (1982 йилда туғилган) бошқарувидаги Cobalt автомашинаси тўхтатилиб текширилган. Натижада унда 5572 дона «Регапен» кучли таъсир қилувчи дори воситалари борлиги аниқланиб, процессуал тартибда расмийлаштириб олинган. Сўнгра тезкор тадбир давом эттирилиб, Сирдарё вилоятининг Янгиер шаҳрида яшовчи М.Й. (1991 йилда туғилган) мазкур дори воситаларини Тошкент шаҳрида қабул қилиб олган вақтда ушланган.
Шунингдек, у дори воситаларининг бир қисмини Чилонзор туманида яшовчи Б.Б.га (1985 йилда туғилган) сотиши кераклиги маълум бўлиб, у ҳам қўлга олинган.
Бундан ташқари, тегишли кўрсатмалар асосида жиноий гуруҳ етакчилари — Тошкент шаҳрида яшовчи Н.А. (1983 йилда туғилган) ва Қўқон шаҳрида яшовчи Р.М. (1996 йилда туғилган)лар ҳам ушланган. Р.М.нинг яшаш хонадони кўздан кечирилганда 3542 дона «Регапен» дори воситаси борлиги аниқланган.
Таъкидланишича, ушбу кучли таъсир қилувчи дори воситалари Ўзбекистонга Қирғизистон Республикасидан контрабанда йўли билан олиб келинган.
Жиноят ишлари бўйича Оҳангарон шаҳар суди томонидан Р.М. ва М.Й.га нисбатан 5 йил, Н.А.га 3 йил муддатга озодликдан маҳрум қилиш жазоси тайинланган. Б.А. ва Б.Б.ларга эса 5 йил муддатга озодликдан маҳрум қилиш жазоси тайинланиб, Жиноят кодексининг 72-моддаси қўлланган ҳолда тайинланган жазо шартли деб ҳисобланиб, уларга 2 йил синов муддати белгиланган.
Изоҳ (0)