Navoiy, Namangan va Sirdaryo viloyatlarida imtiyozli kredit mablag‘larini talon-toroj qilish holatlari aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Karmana tuman bo‘limi tomonidan tergovga qadar tekshiruv o‘tkazilgan. Unda S.A. va M.A. ismli fuqarolar “K.T.” MCHJni tashkil etib, biolaboratoriya jihozlari va boshqa kerakli uskunalar olish uchun hududiy tijorat banki filialidan 2,5 milliard so‘m imtiyozli kredit olgani aniqlangan. Ular mablag‘ni go‘yoki uskuna va jihozlar sotib olish mazmunida 9 ta xo‘jalik yurituvchi subyektlarga ko‘chirish orqali o‘zlashtirish yo‘li bilan talon-toroj qilgan.
Shuningdek, departamentning Namangan tuman bo‘limi tomonidan o‘tkazilgan tergovga qadar tekshiruvda “X.z.” MCHJ rahbari F.X., “U.Yu.” xususiy korxonasi rahbari M.A. va boshqalar qo‘lga tushgan. Ular o‘zaro til biriktirib, hududiy tijorat banklari filialidan parrandachilikni rivojlantirish hamda zamonaviy gidroponik issiqxona qurish uchun ajratilgan 2,2 milliard so‘m va 486 970 dollar miqdoridagi kredit mablag‘larini boshqa maqsadlarda sarflab, o‘zlashtirish yo‘li bilan talon-toroj qilgani aniqlangan.
Departamentning Guliston tuman bo‘limi tomonidan o‘tkazilgan tergovga qadar tekshiruvda “A.X.” MCHJ rahbari R.R., “S.I.” fermer xo‘jaligini norasmiy boshqarib kelgan S.B. va boshqalar ushlangan. Ular “A.X.” MCHJga tomorqachilik faoliyatini rivojlantirish uchun texnika va jihozlar sotib olishga ajratilgan 1,9 milliard so‘m imtiyozli kredit mablag‘ini naqdlashtirib olib, talon-toroj qilgan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)