O‘zbekiston Musulmonlari idorasi raisining birinchi o‘rinbosari Homidjon domla Ishmatbekov so‘nggi kunlarda o‘z joniga qasd qilish bilan bog‘liq holatlar ko‘paygani munosabati bilan fuqarolarga murojaat bilan chiqdi.
Inson umri, uning hayoti Alloh taolo ato etgan ulug‘ ne’matlardan biri hisoblanadi. Inson mana shu umrni Allohning amriga muvofiq o‘tkazmoqligi, barcha ne’matlarga shukrona keltirib yashamoqligi, jumladan, Alloh bergan umrni dunyo va oxiratga manfaatli amallar bilan o‘tkazmoqligi dinimiz ko‘rsatmasi hisoblanadi.
Albatta, bu hayotda inson turli-tuman holatlarni boshidan o‘tkazadi. Yaxshilik ham bor, yomonlik ham bor, xursandchilik ham bor, musibat ham bor. Bu Allohning ilohiy hikmati. Insonni bu dunyoga imtihon uchun yaratdi. Uning boshiga sinovlar solishini ham oldindan ma’lum qilib qo‘ydi.
Lekin haqiqiy mo‘min inson mana shu imtihonlarning hammasini Allohdan deb bilsa, e’tiqodni mahkam tutsa, hidoyat yo‘lidagi, Allohning mag‘firatiga sazovor banda bo‘ladi.
Alloh sabr qilishga buyurgan. Bu sinovlardan faqat Allohga suyanib, sabr bilan o‘tish kerak. Kim sabr qilsa, musibatlarni Allohdan deb bilib, faqat undangina so‘rasa, Alloh ana shu banda bilan bo‘ladi: “Alloh taolo sabr qiluvchilar bilan birgadir”.
Endi ba’zi bir e’tiqodi sust insonlar dunyoviy musibatlarni ko‘tara olmaganidan, sabr qilolmaganidan yoki Alloh taoloni yaxshi tanimagani, barchasi undan ekanini anglamaganidan mana shu musibatlardan qutulish chorasi o‘laroq o‘z joniga qasd qiladi. Alloh taolo harom qilgan eng og‘ir kabira gunohlaridan biri — inson o‘z joniga qasd qilmoqligi.
Alloh taolo shunday deydi: “Kimki o‘z joniga qasd qilsa, men unga jannatni harom qildim”. Demak bizni oxiratda alamli azobda qolishimiz, jannatdan mahrum bo‘lishimiz mana shu gunoh sababli bo‘ladi.
Inson tafakkur qilishi kerak. Avvalo taqdir, yaxshilik ham, yomonlik ham Allohdan degan iymonimizning ajralmas qismi borki, biz unutmasligimiz kerak. Alloh kimgadir musibatni gunohlarga kafforat bo‘lishi uchun, sabr qilganida mukofotlash uchun yuboradi.
Dinimiz insonni aziz-u mukarram qilganidek, uning jonini ham omonat qilgan, — deydi Homidjon domla Ishmatbekov
Izoh (0)