FIFA Krishtianu Ronaldu Urugvayga qarshi bahsdagi birinchi golni urmaganini tasdiqladi.
O‘yin to‘piga o‘rnatilgan datchik ma’lumotlari portugaliyalik hujumchi birinchi golga to‘pga tegmaganligini ko‘rsatdi, deya xabar beradi ESPN nashri FIFA va Jahon Chempionati uchun maxsus to‘p ishlab chiqaruvchi adidas’ga tayanib.
“Adidas texnologiyasi tufayli Ronaldu birinchi golga to‘pga tegmaganini aniq aytishimiz mumkin.
O‘sha paytda to‘pga tashqi kuch ta’sir o‘tkazmagan. Bu bizning o‘lchovlarimizda o‘zgarishlarning yo‘qligi bilan izohlanmoqda. To‘p ichiga o‘rnatilgan 500 gers chastotali IMU sensori bu tahlilda juda aniq tahlil qilish imkonini beradi”, — deyiladi FIFA bayonotida.
JCH—2022da foydalanilayotgan har bir to‘pda xuddi shunday datchiklar o‘rnatilgan. Bu texnologiya o‘yindan tashqari holatlarni aniqlashda, noaniq to‘pga teginishlarni aniqlashga yordam beradi.
54-daqiqada Portugaliya hisobni ochdi. Dastlab gol hujumchi Krishtianu Ronaldu hisobiga yozildi. Keyinchalik esa 37 yoshli futbolchi to‘pga tegmagani aniqlandi va gol Brunu Fernandeshga yozildi.
Avvalroq Portugaliya futbol federatsiyasi FIFAga Ronaldu birinchi golni urganini tasdiqlovchi dalillarni yuborishga qaror qilgani xabar qilingandi.
Izoh (0)