So‘nggi bir yil ichida Nastya 28 million dollar ishlab topdi va dunyoning yarmini kezib chiqdi, deb yozadi “Woman.ru”.
Ikki oydan keyin krasnodarlik Nastya Radzinskaya navbatdagi tug‘ilgan kunini nishonlaydi va yana bir yoshga ulg‘ayadi: hozir u 8 yoshda. Har qanday inson bir qarashda bu qizaloqni internet yulduzi sifatida tan olishi dargumon. Lekin aynan shunday.
Nastya 8 yosh bo‘lishiga qaramay ishi, muxlislari va bank hisoblarida bir qancha puli bor. Internetda u “Like Nastya” nomi bilan tanilgan va uning YouTube kanaliga 102 million kishi obuna bo‘lgan. U ota-onasi bilan birga Mayamida yashaydi, videolar suratga oladi, sayohat qiladi va moda olamini kuzatib boradi. Shu tufayli ko‘p yillar davomida u Forbes’ning dunyodagi eng boy blogerlar reytingida birinchi o‘rinda turadi.
Nastya Radzinskaya 2014-yilda tug‘ilgan va shifokorlar darhol unga miya falajining og‘ir shakli tashxisini qo‘ygan. Shifokorlar ota-onaga Nastyani hech qachon yurolmasligi yoki gapirishni o‘rganmasligi va qolgan umrini nogironlar aravachasida o‘tkazishi mumkinligini aytgan.
Yosh juftlikning so‘zlariga ko‘ra, ular umidsizlikka tushmadi, taslim bo‘lmadi, lekin birin-ketin davolashning turli usullarini, shu jumladan noan’anaviy yo‘llarni ham sinab ko‘rishni boshladi.
Bir kuni maqolalardan birida ular kamerada ishlash qizga tashqi dunyo bilan aloqa o‘rnatishga yordam berishini o‘qib qoladi. Keyin ular Nastyaga yangi o‘yinchoqlarni qanday ochishi, bolalar bog‘chasiga qanday borishi, istirohat bog‘larida aylanishi yoki shunchaki hovlida yurishi haqida qisqa videolarni suratga olishni taklif qildi. Shuningdek, unga taxallus bilan chiqishga ruxsat beradi. U “Like Nastya”ni tanladi. Kamera oldida qiz o‘zini iloji boricha tabiiy tutdi, hatto unga aktyorlik mahoratini o‘rgatish ham shart emas edi.
Oradan bir necha oy o‘tgach, qizning otasi-onasi uning videosini ko‘rishlar soni tez sur’atlar bilan oshib borayotgani va unga nafaqat rus tilida, balki ingliz, arab, ispan va boshqa tillarda ham izohlar yozilayotganini payqadi. Dastlab unga mashhurlik, keyin esa minglab, millionlab dollarlar kela boshladi.
Anna keyinroq o‘zining tadbirlar tashkil etish loyihasini hamda to‘y marosimi uchun salonini ishga tushirdi. Ikkala biznes ham oilaga barqaror daromad keltirdi.
Chunki 2014-yilda Anna va Yuriy qizi tug‘ilganidan so‘ng barcha ishini orqaga surib, uning davolanishiga e’tibor qaratishi kerak edi. Shifokorlarning ogohlantirishidan qo‘rqib, ular eng yomoniga tayyorgarlik ko‘rdi, ammo ikki yil o‘tgach, Nastya me’yorda rivojlanayotgani ma’lum bo‘ldi.
“Yoki davolanish va sevgimiz yordam berdi, yoki shifokorlar tashxisda xato qildi”, — deydi qizning onasi.
Shunday qilib yoqimli, sevimli mashg‘ulot tufayli oila yana bir daromad manbaiga ega bo‘ldi. Nastya YouTube kanalini endigina yaratganda, unda hech qanday reklamalar bo‘lmagan, bloger avtomatik ravishda prerollardan pul olgan. Radzinskiylar hisobiga tushgan birinchi katta miqdor 20 ming rubl (330 dollar) edi.
“Biz hamma narsa yanada o‘sishini angladik: bugun 20 000 keldi, ertaga bundan ham ko‘proq bo‘ladi. Shu sur’atda oyiga taxminan 10 000 dollar ishlab olardik — bu yaxshi daromad”, — deydi er-xotin.
Oila hayotidagi ikkinchi burilish nuqtasi — endi Nastya sayohat paytida tanildi. Tailand, Malayziya, Indoneziya va boshqa mamlakat bolalari uning oldiga yugurib kelib, suratga tushishni iltimos qildi.
Shundan so‘ng Radzinskiylar qizining karyerasini, shu jumladan turli xil kontentlar orqali yanada rivojlantirishga qaror qilidi. Ular Nastya hali maktabga bormagani uchun biron bir joyga bog‘lanmaganini, shuning uchun istalgan joyda yashashi mumkinligini tushundi. Birinchi bo‘lib oila Osiyoga, keyin esa Mayamiga ko‘chib o‘tdi. Anna va Yuriy boshqa ishini to‘xtatib, qizining kanalini rivojlantirishga e’tibor qaratdi.
Shu tarzda jarayon to‘liq huquqli biznesga aylandi: Radzinskiylar har kuni videolar chiqara boshladi, muharrirlar guruhi va maxsus effektlar bo‘yicha mutaxassislar yolladi, mos rekvizitlar — g‘ayrioddiy o‘yinchoqlar, kiyimlar, aksessuarlar, manekenlar topdi. Asta-sekin birinchi yirik reklama kompaniyalari — Danone’dan Mercedes’gacha qizga murojaat qila boshladi.
Forbes jurnaliga ko‘ra, 2021-yilda Nastya 28 million dollar ishlab topgan, bu avvalgi yilgidan 10 million dollarga ko‘p edi. Shunday qilib Nastya nafaqat YouTube'ning rus segmentida yetakchi, balki doimiy ravishda dunyodagi eng mashhur blogerlar o‘nligi qatoriga kirdi.
Izoh (0)