Сўнгги бир йил ичида Настя 28 миллион доллар ишлаб топди ва дунёнинг ярмини кезиб чиқди, деб ёзади «Woman.ru».
Икки ойдан кейин краснодарлик Настя Радзинская навбатдаги туғилган кунини нишонлайди ва яна бир ёшга улғаяди: ҳозир у 8 ёшда. Ҳар қандай инсон бир қарашда бу қизалоқни интернет юлдузи сифатида тан олиши даргумон. Лекин айнан шундай.
Настя 8 ёш бўлишига қарамай иши, мухлислари ва банк ҳисобларида бир қанча пули бор. Интернетда у «Like Nastya» номи билан танилган ва унинг YouTube каналига 102 миллион киши обуна бўлган. У ота-онаси билан бирга Майамида яшайди, видеолар суратга олади, саёҳат қилади ва мода оламини кузатиб боради. Шу туфайли кўп йиллар давомида у Forbes’нинг дунёдаги энг бой блогерлар рейтингида биринчи ўринда туради.
Настя Радзинская 2014 йилда туғилган ва шифокорлар дарҳол унга мия фалажининг оғир шакли ташхисини қўйган. Шифокорлар ота-онага Настяни ҳеч қачон юролмаслиги ёки гапиришни ўрганмаслиги ва қолган умрини ногиронлар аравачасида ўтказиши мумкинлигини айтган.
Ёш жуфтликнинг сўзларига кўра, улар умидсизликка тушмади, таслим бўлмади, лекин бирин-кетин даволашнинг турли усулларини, шу жумладан ноанъанавий йўлларни ҳам синаб кўришни бошлади.
Бир куни мақолалардан бирида улар камерада ишлаш қизга ташқи дунё билан алоқа ўрнатишга ёрдам беришини ўқиб қолади. Кейин улар Настяга янги ўйинчоқларни қандай очиши, болалар боғчасига қандай бориши, истироҳат боғларида айланиши ёки шунчаки ҳовлида юриши ҳақида қисқа видеоларни суратга олишни таклиф қилди. Шунингдек, унга тахаллус билан чиқишга рухсат беради. У «Like Nastya»ни танлади. Камера олдида қиз ўзини иложи борича табиий тутди, ҳатто унга актёрлик маҳоратини ўргатиш ҳам шарт эмас эди.
Орадан бир неча ой ўтгач, қизнинг отаси-онаси унинг видеосини кўришлар сони тез суръатлар билан ошиб бораётгани ва унга нафақат рус тилида, балки инглиз, араб, испан ва бошқа тилларда ҳам изоҳлар ёзилаётганини пайқади. Дастлаб унга машҳурлик, кейин эса минглаб, миллионлаб долларлар кела бошлади.
Анна кейинроқ ўзининг тадбирлар ташкил этиш лойиҳасини ҳамда тўй маросими учун салонини ишга туширди. Иккала бизнес ҳам оилага барқарор даромад келтирди.
Чунки 2014 йилда Анна ва Юрий қизи туғилганидан сўнг барча ишини орқага суриб, унинг даволанишига эътибор қаратиши керак эди. Шифокорларнинг огоҳлантиришидан қўрқиб, улар энг ёмонига тайёргарлик кўрди, аммо икки йил ўтгач, Настя меъёрда ривожланаётгани маълум бўлди.
«Ёки даволаниш ва севгимиз ёрдам берди, ёки шифокорлар ташхисда хато қилди», — дейди қизнинг онаси.
Шундай қилиб ёқимли, севимли машғулот туфайли оила яна бир даромад манбаига эга бўлди. Настя YouTube каналини эндигина яратганда, унда ҳеч қандай рекламалар бўлмаган, блогер автоматик равишда прероллардан пул олган. Радзинскийлар ҳисобига тушган биринчи катта миқдор 20 минг рубль (330 доллар) эди.
«Биз ҳамма нарса янада ўсишини англадик: бугун 20 000 келди, эртага бундан ҳам кўпроқ бўлади. Шу суръатда ойига тахминан 10 000 доллар ишлаб олардик — бу яхши даромад», — дейди эр-хотин.
Оила ҳаётидаги иккинчи бурилиш нуқтаси — энди Настя саёҳат пайтида танилди. Таиланд, Малайзия, Индонезия ва бошқа мамлакат болалари унинг олдига югуриб келиб, суратга тушишни илтимос қилди.
Шундан сўнг Радзинскийлар қизининг карьерасини, шу жумладан турли хил контентлар орқали янада ривожлантиришга қарор қилиди. Улар Настя ҳали мактабга бормагани учун бирон бир жойга боғланмаганини, шунинг учун исталган жойда яшаши мумкинлигини тушунди. Биринчи бўлиб оила Осиёга, кейин эса Майамига кўчиб ўтди. Анна ва Юрий бошқа ишини тўхтатиб, қизининг каналини ривожлантиришга эътибор қаратди.
Шу тарзда жараён тўлиқ ҳуқуқли бизнесга айланди: Радзинскийлар ҳар куни видеолар чиқара бошлади, муҳаррирлар гуруҳи ва махсус эффектлар бўйича мутахассислар ёллади, мос реквизитлар — ғайриоддий ўйинчоқлар, кийимлар, аксессуарлар, манекенлар топди. Аста-секин биринчи йирик реклама компаниялари — Danone’дан Mercedes’гача қизга мурожаат қила бошлади.
Forbes журналига кўра, 2021 йилда Настя 28 миллион доллар ишлаб топган, бу аввалги йилгидан 10 миллион долларга кўп эди. Шундай қилиб Настя нафақат YouTube'нинг рус сегментида етакчи, балки доимий равишда дунёдаги энг машҳур блогерлар ўнлиги қаторига кирди.
Изоҳ (0)