Mashina ruliga o‘tirgan inson borki, yo‘l-patrul xizmati xodimlari bilan muloqot qilishiga to‘g‘ri keladi. Albatta, bu yaxshi. YPX xodimlari sabab, qanchadan-qancha ko‘ngilsiz hodisalarning oldi olinadi. San’at vakillari ham ba’zida YPX xodimlari bilan ziddiyatga boradi va qoidabuzarliklari uchun jarimaga tortiladi. Quyida ana shunday san’atkorlar haqida so‘z yuritiladi.
Halima Ibrohimova: “Topganing o‘ligingga buyursin”
Komik aktrisa Halima Ibrohimova kamdan-kam hollarda avtomobil boshqaradi. Bu vazifani ko‘p hollarda turmush o‘rtog‘i bajaradi. Ammo yo‘l qoidasini buzish bilan bog‘liq holatlar unda ham bo‘lib turadi. Masalan, o‘tgan yili aktrisa Malibu avtomobilida yo‘l chizig‘ini bosganini videoga olib, IIB ga jo‘natgan insonlardan ranjigani haqidagi videoni Instagram sahifasiga joylagandi.
Durdona Qurbonova jonli efirda ‘qo‘lga tushdi’
Aktrisa Durdona Qurbonova o‘z qilmishini oshkor qiladigan haydovchilardan biri. U shu yilning 22-avgust kuni avtomobilni boshqarib, Instagram’ga video joylagan. U suratga olish maydonchasiga shoshilib turgan vaqti mashina boshqara turib rulda pardoz qilishi haqida gapirgan va bu orqali yo‘l qoidalariga amal qilmasligini sezdirib qo‘ygan. Toshkent shahar IIBB YHXB xodimlari holat yuzasidan surishtiruv ishlarini olib borishgan. Aktrisa yo‘ldagi qoidabuzarligi uchun tegishli tartibda jazolangan.
Osmon Navro‘zov 30 million jarimaga tortildi
Qoraqalpog‘istonlik xonanda Osmon Navro‘zov tezlikni oshirish va jarima to‘lash bo‘yicha hamisha peshqadam. U yil boshidan buyon 30 milliondan ziyodroq jarima to‘laganligi haqida aytib o‘tdi.
— Qoraqalpog‘iston va Xorazmdagi YPX xodimlari mashinam raqamini yaxshi bilishadi. Ba’zan to‘yga shoshilayotganda tezlikni oshirishga majbur bo‘lamiz. Jarimalarni vaqtida to‘laganim uchun biroz chegirma qilib berishgan. Yo‘qsa, 50 milliondan ortiqroq jarima to‘lashim kerak edi. Uyimizda “qora xat” kelaverganidan keyin dadam mashinamga antiradar o‘rnatib bergan. Shunda ham “qora xat”lar kamaygani yo‘q, — deydi xonanda Osmon Navro‘zov.
Farruh Raimov: “ ‘Qora xat’ kam keladi”
Xonanda Farruh Raimov tartibli haydovchilardan biri hisoblanadi. U asosan beglilangan yo‘l chiziqlarini bosgani uchun jarima to‘lagani haqida ma’lumot berdi.— Shukrki, uyimizga “qora xat”lar kamdan-kam hollarda keladi. Yaqin orada qachon kelganini ham eslolmayman. Mashina boshqarishni erta boshlaganim uchun yomon haydovchi emasman, — deydi Farruh Raimov.
Kaniza YPX xodimiga bo‘ysunmadi
Hamisha shou-shuvlar girdobidagi xonanda Kaniza ham yo‘l-patrul xizmati xodimlari bilan ziddiyatga borgan. Xonandaning YPX xodimi bilan kechgan tortishuvi ham ijtimoiy tarmoqlarga ko‘plab bahs-munozaralarga sabab bo‘lgandi. Ya’ni xonanda mashinasiga tortilgan tonirovkaning foydalanish muddati o‘tib ketganligi uchun jarimaga tortilgandi.
Undan keyin esa xonandaning xodimga bo‘ysunmagani uchun xodim tomonidan hujjatlari olib qo‘yilgan video ham tarqalgandi. Xonanda esa unga tuhmat qilishayotgani haqida aytib o‘tgandi.
Doniyor Qayumovga bloger ekani foyda bermadi
Instabloger Doniyor Qayumov mashina oynasini noqonuniy tarzda qoraytirgani uchun jarimaga tortilgan. U yo‘l-patrul xizmati xodimlariga bloger ekani va videolarida bu soha vakillariga yon bosishi haqida tushuntirib, jarimani yengillatmoqchi bo‘lgan. Ammo video so‘nggida ko‘rish mumkinki, uning mashinasi jarima maydonchasiga olib borilgan.
Janob Rasul: “Viloyat yo‘llari talabga javob bermaydi”
YPX xodimlari bilan tez-tez ziddiyatli vaziyatlarga boradigan xonanda Janob Rasulning videosi ham ijtimoiy tarmoqlarda ko‘plab bahs-munozaralarga sabab bo‘lgandi.
— Bu soha vakillariga nisbatan hech qanday xusumatim yo‘q. Videoda aytib o‘tganimdek, men ham hamma qatori fuqaroman va qilgan ishim uchun javob beraman. Faqat ba’zida alam qiladigani viloyat yo‘llari talabga javob bermaydi va yo‘l-patrul xizmati xodimlari qoidaga amal qilishni talab qilishadi. Yo‘l chiziqlari tegishli tartibda chizilmagan bo‘lsa haydovchini ayblash ham noto‘g‘ri, — deydi xonanda Janob Rasul.
Umid Haydarov: “Xalqdan uzr so‘radim”
“Million” jamoasining sobiq a’zosi Umid Haydarovni ham tartibli haydovchi deb bo‘lmaydi. Uni mashina rulidagi videosi ham ko‘plab bahs-munozalarga sabab bo‘lgan.
— Bu haqda hech qayerda izoh berganim yo‘q. Elning og‘ziga elak tutib bo‘lmaydi. Har xil gap so‘zlar bo‘lyapti. Kim haq, kim esa nohaqligi bo‘yicha tegishli tashkilotlar shug‘ullanishyapti. Videoni tarqatgan insonning ustidan hech qayerga shikoyat qilganim yo‘q. U oila bilan esa sudda murosaga kelamiz.O‘sha voqeada qilgan xatti-harakatim uchun esa xalqdan uzr so‘radim. Odamlardan iltimosim shuki, ko‘zingiz bilan ko‘rmagan narsaga izoh qoldirishdan tiyilish kerak. Bo‘lmasa bu g‘iybat bo‘lib qoladi. Tanganing ikki tomoni bo‘lganidek, tarqatilgan videoni ko‘rib, bir tomonlama xulosa qilish yaramaydi.
Jasur Umirov: “3800 AQSH dollari jarima kelgan”
Xonanda Jasur Umirov bir paytlar svetafor nima ekanligini bilmagani va yo‘l qoidalariga bo‘ysunmagani uchun 3800 AQSh dollari miqdorida jarimaga tortilgani haqida aytib o‘tdi.
— U paytlari bir kunda 12 tagacha to‘ylarga borardik. Bunday paytda shoshmaslikning iloji yo‘q edi. Haydovchi mashinani “uchirardi”. “Men-ku, to‘ydan 500 AQSH dollari olaman, sen 50 ming so‘m uchun o‘lib ketmoqchimisan?” deb hazillashardim. U paytlari svetafor nima ekanligini bilmasdik, tezligimiz ham katta bo‘lardi. Bir marta 3800 AQSH dollari miqdorida jarima kelgan. Hozir to‘ylar u qadar ko‘p emas. Bitta men emas. Boshqalar ham qoidalarga amal qiladigan bo‘lib qolishgan, — deydi xonanda Jasur Umirov.
Mavzuga doir:
- Irqchi, zo‘ravon va qoidabuzar: Gollivudda nomaqbul ishlari uchun qora ro‘yxatga kiritilgan yulduzlar (foto)
- Tan soqchisining pichoqlanishidan tortib tegajog‘likkacha: to‘ylarda o‘zbekistonlik xonandalar duch keladigan ayanchli va kulgili holatlar
- Muxlisni siltab tashlagan Shohjahon Jo‘rayev, tomoshabinga tarsaki tushirgan Alisher Uzoqov: San’atkorlarni qanday holatlar asabiylashishga majbur qiladi? (video)
Izoh (0)