O‘zbekistonda maktabgacha yoshdagi bolalar uchun ikkita yangi “Imkon” reabilitatsiya markaziga ega ixtisoslashtirilgan maktabgacha ta’lim tashkiloti ishga tushdi. Bu haqda Maktabgacha ta’lim vazirligi “Daryo”ga ma’lum qildi.
Qayd etilishicha, Toshkent viloyati Qibray tumanida birdaniga uchta yangi maktabgacha ta’lim tashkilotining ochilish marosimi bo‘lib o‘tgan. Ular Qibray tumani va Qarshi shahridagi “Imkon” reabilitatsiya markazlariga ega ikkita davlat ko‘p tarmoqli ixtisoslashtirilgan maktabgacha ta’lim tashkiloti, shuningdek, Buxoro shahrida O‘zbekiston Respublikasi Maktabgacha ta’lim vazirligi hamda Lukoyl O‘zbekiston Opereyting Kompani MCHJ bilan hamkorlikda qurilgan va tajriba-sinov tariqasida faoliyat yuritayotgan “Qandimcha” nomli maktabgacha ta’lim tashkiloti bo‘lib, unda yiliga 550 nafargacha bolani qabul qilish imkoni mavjud.
Bundan tashqari, “Imkon” reabilitatsiya markazlariga ega davlat ko‘p tarmoqli ixtisoslashtirilgan maktabgacha ta’lim tashkilotlari qoshidagi har bir reabilitatsiya markazi yiliga 2,6 ming nafarga yaqin bolaga malakali yordam ko‘rsatish imkoniyatiga ega bo‘ladi.
Buxoro (250 o‘rinli), Qashqadaryo (150 o‘rinli) va Toshkent viloyatlarida (150 o‘rinli) yangi maktabgacha ta’lim tashkilotlari qurilgan. “Imkon” reabilitatsiya markaziga ega ko‘p tarmoqli ixtisoslashtirilgan maktabgacha ta’lim tashkilotlari - imkoniyati cheklangan bolalar uchun, xorijda malaka oshirgan eng kuchli professional mutaxassislarning nazorati ostida bir vaqtning o‘zida sifatli ta’lim olish hamda nuqsonlarni bartaraf etishdagi davolanish imkoniyati hisoblanadi.
“O‘zbekiston - ta’lim tizimiga faol sarmoya kiritmoqda. Vazirlik tashkil etilganidan buyon o‘tgan besh yil davomida mamlakatda maktabgacha ta’limni qamrab olish darajasi 29 foizdan 70 foizga oshdi. Biz uchun bu strategik ahamiyatga ega. Xususiy sektor bilan hamkorlik prinsipial muhim qadam bo‘ldi. Ayniqsa, “Lukoyl” bilan ishonchli ikki tomonlama hamkorlikni alohida ta’kidlamoqchiman. Har bir obyektga katta kuch, qalb va bolalarga bo‘lgan haqiqiy muhabbat jo etildi. Kelajak avlodga yo‘naltirilgan sarmoya mamlakat taraqqiyotiga, uning salohiyat va imkoniyatlarini yuksaltirishga qo‘shilgan hissadir. Ijtimoiy faol tadbirkorlikka o‘rnak bo‘la oladigan kompaniyadan minnatdormiz”, – deydi maktabgacha ta’lim vaziri Agrippina Shin.
Buxoro shahridagi “Qandimcha” nomli maktabgacha ta’lim tashkiloti ikki qavatli binodan iborat bo‘lib, umumiy maydoni 11 ming kvadrat metrni tashkil etadi. Unda eng zamonaviy texnologiya va jihozlarga ega guruh xonalari, suzish havzasi, raqs va sport zallari, kompyuter sinfi mavjud.
Izoh (0)