“Vazirlikdagilarning 30 mln so‘m oyligi bir kun ham kechikmaydi, biz esa 3 millionga yetmagan pulimizni oylab kutamiz”. Energetikaning ayrim xodimlari “o‘gay”mi?

Energetika vazirligi huzuridagi “O‘zneftigazinspeksiya” va “O‘zenergoinspeksiya” xodimlari vazirlikka “o‘gay” xodim ekanini aytmoqda. Ularning bildirishicha, vazirlik 400 nafar xodimining olti oylik maoshini bermay, sarson qilmoqda.

Kuz-qish mavsumi tayyorgarligi tugadi. Elektr energiyasi va tabiiy gaz ta’minoti uchun tayyorgarlik ko‘rildi. Yil davomida energetika obyektlarida olib borilgan rekonstruksiya, yangi transformatorlar yoki tortilgan simlar, gaz qurilmalari-yu, trubalarida nazorat bo‘lishi kerak edi. Rostan qog‘ozdagi “ulkan” ishlar amalda bajarilgan. Buni kim nazorat qiladi? Albatta, “O‘zneftigazinspeksiya” va “O‘zenergoinspeksiya” xodimlari.

Endi tasavvur qiling, 2 million so‘m oylik oladigan inspektor butun tizimni qanday nazorat qiladi? Bugungi gaz ta’minotidagi va elektr energiyasidagi muammolar qanday vujudga keldi? O‘ylab ko‘rdingizmi? Nazoratchilar qayerga qaradi, degan savol tug‘iladi. Buni Energetika vazirligi vallomatlari hech o‘ylab ko‘rdimi? O‘zlari “otning kallasidek” oylik olsa, bo‘ldi. Bu vallomatlar xodimlari halol va to‘g‘ri ishlashi uchun ularga ish haqqini o‘z vaqtida berish kerakligini yodidan chiqardi. Xodim to‘g‘ri ishlasa, tizimdagi ishlar ham to‘g‘ri bo‘ladi-da, — deydi maoshini ololmayotganini aytgan xodimlardan biri.

Murojaatchi xodimlarning tushuntirishicha, ularning bir oylik maoshi budjetdan beriladigan pul va vazirlik fondidan beriladigan yo‘lkira, ovqat puli, oylik mukofot va bayram pullaridan iborat.

“O‘zneftigazinspeksiya” va “O‘zenergoinspeksiya” xodimlari budjetdan 1,7 milliondan 2 million so‘mgacha maosh olsak, vazirlikdan yo‘lkira, ovqat puli, oylik mukofot va bayram pullarini olamiz. Shunda ham maoshimiz nari borsa 3 million so‘mga yetadi. Eng yomoni may, iyun, iyul, avgust, sentabr, oktabr va mana noyabr oylari uchun ham vazirlikdan bir so‘m ham olganimiz yo‘q. Nega oylik berilmayapti desak, hisob raqamimizda pul yo‘q deyishadi. Lekin vazirlik apparatidagi xodimlar 30 million so‘mlik maoshini bir kun ham kechiktirmay oladi, — deydi murojaatchi xodimlar.

“Daryo” murojaatchilarning mazkur da’vosiga ko‘ra, Energetika vazirligi mas’ullari bilan bog‘lanib, holatga izoh so‘radi.

Vazirlik axborot xizmati mas’uli Obidjon Dilmurodovning aytishicha, mazkur muammodan vazirlik mutasaddilarining ham xabari bor.

Vazirlikda rahbar o‘zgargach, vazirimizning shaxsan o‘zlari bu masalaga e’tibor qaratgan va “O‘zneftigazinspeksiya” hamda “O‘zenergoinspeksiya” xodimlarining bir necha oydan beri to‘planib qolgan maoshlarini hal etishga kirishgan. Dastlab fonddagi mablag‘lardan fevral, mart, aprel va may oylari uchun to‘lanishi lozim bo‘lgan pullar to‘lab berildi. Erta-indin iyun, iyul, avgust, sentabr, oktabr va noyabr oylarining maoshlari ham to‘lab beriladi, — deydi Obidjon Dilmurodov.

Vazirlik mas’uli murojaatchi xodimlarning vazirlik apparatidagilar maoshini o‘z vaqtida, oyma-oy olayapti degan gapini inkor etmadi.

To‘g‘ri, vazirlik apparatidagilarning fond mablag‘laridagi maoshlarida muammo yo‘q, — dedi Obidjon Dilmurodov.

Vazirlik mas’uli “Daryo” jurnalistining “Vazirlik apparatidagi xodimlar maoshini to‘lashda fondda mablag‘ muammo bo‘lmaydi-yu, ‘O‘zneftigazinspeksiya’ va ‘O‘zenergoinspeksiya’ xodimlari maoshiga kelganda fond mablag‘lari tugab qoladimi”, degan savoliga “Vazirlik apparatidagilar kam, nari borsa 80 kishini tashkil etadi, shu bois bu masalada muammo bo‘lmagan. Bu xodimlarning oylik maoshidagi muammolar ham tez orada hal etiladi”, — deya javob berdi.

Vazirlikning maoshini ololmayotgan xodimlari esa mas’ulning gapini inkor etib, mart oyi uchun ham to‘liq hisob-kitob qilinmaganini ta’kidlamoqda.

Sizga may oyini ham hisob-kitob qilganmiz deya ma’lumot berishganini eshitdik, ammo mart oyi ham to‘liq hisob-kitob qilinmagan. Mart oyidagi bayram pullarini haligacha olganimiz yo‘q. Bu muammo yuzasidan shikoyat qilayotganimizni bilishgani uchun, imkon qadar masalani yopti-yopti qilishga urinishmoqda. Qaysi sayt muammoni olib chiqsa ham, shunchaki munosabat berish bilan qutilamiz deyishmoqda, — deydi maoshini ololmayotgan xodimlar.

Maoshini ololmayotgan xodimlar shuningdek, “Ikki million maosh olamiz, u yo‘l puli bo‘lishdan nariga yaramayapti. Har kuni uyga pulsiz qaytish va bolalar ko‘ziga qarash azob. Ishlasang, ammo mehnating uchun o‘z vaqtida pul olmasang, haqqingni talab qilsang, kim shikoyat qildi deya muammoni hal etish o‘rniga haqiqatni gapirganlarni izlashadi. Topishsa, bahona qilib, ishdan ham haydaydi. Alamlisi, vazirlik xodimlari 30 million so‘mlab maosh oladi, o‘z vaqtida tag‘inam. Lekin qora mehnat qilayotgan xodimlarga arzimagan maoshini ham bermay sarson qilishadi. Shumi adolat?”, — demoqda.

Eslatib o‘tamiz, Prezidentning “O‘zbekiston Respublikasi yoqilg‘i-energetika tarmog‘ini boshqarish tizimini tubdan takomillashtirish chora-tadbirlari to‘g‘risida”gi 2019-yil 1-fevraldagi PF-5646-sonli Farmoni va “O‘zbekiston Respublikasi energetika vazirligi faoliyatini tashkil etish chora-tadbirlari to‘g‘risida”gi 2019-yil 1-fevraldagi qaroriga muvofiq Vazirlar Mahkamasi huzuridagi Elektr energetikada nazorat bo‘yicha davlat inspeksiyasi Energetika vazirligi huzuridagi Elektr energetikada nazorat inspeksiyasi etib qayta tashkil etildi va Energetika vazirligi tuzilmasiga o‘tkazilgandi. “O‘zenergoinspeksiya” xodimlari mehnatga haq to‘lash shartlari bo‘yicha Energetika vazirligi markaziy apparati xodimlarining tegishli toifalariga tenglashtirilgan.

“Daryo” voqealar rivojini kuzatishda davom etadi.