Ўзбекистонда мактабгача ёшдаги болалар учун иккита янги «Имкон» реабилитация марказига эга ихтисослаштирилган мактабгача таълим ташкилоти ишга тушди. Бу ҳақда Мактабгача таълим вазирлиги «Дарё»га маълум қилди.
Қайд этилишича, Тошкент вилояти Қибрай туманида бирданига учта янги мактабгача таълим ташкилотининг очилиш маросими бўлиб ўтган. Улар Қибрай тумани ва Қарши шаҳридаги «Имкон» реабилитация марказларига эга иккита давлат кўп тармоқли ихтисослаштирилган мактабгача таълим ташкилоти, шунингдек, Бухоро шаҳрида Ўзбекистон Республикаси Мактабгача таълим вазирлиги ҳамда Лукойл Ўзбекистон Оперейтинг Компани МЧЖ билан ҳамкорликда қурилган ва тажриба-синов тариқасида фаолият юритаётган «Қандимча» номли мактабгача таълим ташкилоти бўлиб, унда йилига 550 нафаргача болани қабул қилиш имкони мавжуд.
Бундан ташқари, «Имкон» реабилитация марказларига эга давлат кўп тармоқли ихтисослаштирилган мактабгача таълим ташкилотлари қошидаги ҳар бир реабилитация маркази йилига 2,6 минг нафарга яқин болага малакали ёрдам кўрсатиш имкониятига эга бўлади.
Бухоро (250 ўринли), Қашқадарё (150 ўринли) ва Тошкент вилоятларида (150 ўринли) янги мактабгача таълим ташкилотлари қурилган. «Имкон» реабилитация марказига эга кўп тармоқли ихтисослаштирилган мактабгача таълим ташкилотлари - имконияти чекланган болалар учун, хорижда малака оширган энг кучли профессионал мутахассисларнинг назорати остида бир вақтнинг ўзида сифатли таълим олиш ҳамда нуқсонларни бартараф этишдаги даволаниш имконияти ҳисобланади.
«Ўзбекистон - таълим тизимига фаол сармоя киритмоқда. Вазирлик ташкил этилганидан буён ўтган беш йил давомида мамлакатда мактабгача таълимни қамраб олиш даражаси 29 фоиздан 70 фоизга ошди. Биз учун бу стратегик аҳамиятга эга. Хусусий сектор билан ҳамкорлик принципиал муҳим қадам бўлди. Айниқса, «Лукойл» билан ишончли икки томонлама ҳамкорликни алоҳида таъкидламоқчиман. Ҳар бир объектга катта куч, қалб ва болаларга бўлган ҳақиқий муҳаббат жо этилди. Келажак авлодга йўналтирилган сармоя мамлакат тараққиётига, унинг салоҳият ва имкониятларини юксалтиришга қўшилган ҳиссадир. Ижтимоий фаол тадбиркорликка ўрнак бўла оладиган компаниядан миннатдормиз», – дейди мактабгача таълим вазири Агриппина Шин.
Бухоро шаҳридаги «Қандимча» номли мактабгача таълим ташкилоти икки қаватли бинодан иборат бўлиб, умумий майдони 11 минг квадрат метрни ташкил этади. Унда энг замонавий технология ва жиҳозларга эга гуруҳ хоналари, сузиш ҳавзаси, рақс ва спорт заллари, компьютер синфи мавжуд.
Изоҳ (0)