“Ota-onalar bolalariga kitob bermay qo‘ydi. Eng yaxshi sovg‘a ular uchun telefon bo‘lib qoldi” — Muftiy Nuriddin Xoliqnazarov

O‘zbekiston musulmonlari idorasi raisi, muftiy Nuriddin Xoliqnazarov kelajak avlod tarbiyasiga, ta’limiga juda katta e’tibor berish kerakligini aytdi.

Uning ta’kidlashicha, farzandlar tarbiyasi, ularning ta’limi bu bizning kelajak mevamiz. Lekin bola o‘z-o‘zidan olim bo‘lib qolmaydi, ota-ona bunga yetarlicha e’tibor qaratishi lozim.

“Bola o‘z-o‘zidan olim bo‘lib qolmaydi, modomiki, uning orqasida ota-onasi turmasa. Imom Buxoriyni voyaga yetkazib, uni butun dunyoga tanitgan — ularning ota-onalarining e’tibori. Otasining halol dunyo topgani, onasining uning tarbiyasiga, ilmiga, ma’rifatiga e’tibor bergani”, — deydi deydi Nuriddin domla.

Uning so‘zlariga ko‘ra, hozirda butun dunyo taniydigan, biz faxrlanadigan ensiklopedik olim Abu Rayhon Beruniyning onasi ham uni o‘qitish uchun yelkasida o‘tin tashib, sotgan ekan. Bolaning ilmiga shu darajada e’tibor bergan.

“Dinda Imom Buxoriy, Imom Termiziy, Imom Moturudiy bilan, fanda Xorazmiy, Beruniy, Mirzo Ulug‘beklar bilan faxrlanamiz. Endi bolalarimizni mana shularning ilmidan o‘qitib, ayni mana shu ilmning egasi bo‘lishga harakat qilishimiz kerak. Bu biz uchun juda muhimdir. Mana shu yo‘lda, biz, ota-onalar birlashishimiz, bolalarimizning ilm-ma’rifatiga e’tibor berishimiz kerak”, — deydi muftiy.

“Bugungi kunda Allohning eng katta ne’mati bo‘lgan ilm, ma’rifatga o‘zimizni qarataylik. Biz tokaygacha ajdodlarimizning nomi bilan faxrlanamiz? Imom Buxoriy avlodimiz, Termiziy, Ibn-Sino, Abu Rayhon Beruniy, Al-Xorazmiy, Bobur Mirzolar, Navoiylar avlodimiz deymiz, lekin faqat nomi bilan maqtanamiz. Ana o‘shalarning qoldirgan merosini qayta tiklaydigan avlodni yetishtirib chiqarish bu bizning vazifamiz”, — deya ta’kidlagan u.

O‘zbekiston musulmonlari idorasi raisi kitob o‘qilmay qo‘yganiga ham to‘xtalib o‘tgan.

“Bolalarimizga sovg‘a sifatida kitob berishni odat qilaylik. Ota-onalar bolalariga kitob bermay qo‘ydi. Eng yaxshi sovg‘a ular uchun telefon bo‘lib qoldi. Kitob o‘qilmay qo‘ydi. Mayli, internetdan ko‘rar, kompyuterdan ko‘rar, lekin hech narsa kitob o‘rnini bosmaydi. Hech qachon kitobdan oladigan ma’naviy ozuqani hech narsadan olomaydi. Biz bolalarimizni kitobga qaytarishimiz kerak. Ilmga, ma’rifatga qaytarishimiz kerak.

Shu o‘rinda savol tug‘iladi, ‘qanday ilm haqida gapiryapsiz, muhtaram domla?’, deb. Ilmlar, azizlar, hammasi ilm. Hamma ilm bir ilm. Har bir ilmda mutaxassisini yetishib chiqarish bizning vazifamiz”, — degan u.

Mavzuga doir:

• “Hozir hammaning o‘z ‘shayxi’ bor Google degan. Yozyapmiz, javobi chiqsa, mana shu to‘g‘ri deb o‘ylayapmiz” — Nuriddin Xoliqnazarov
• “Har bir kishi Umradan qaytib kelgandan keyin kambag‘al va faqir oiladan xabar olish shiorini olg‘a suraylik” — Muftiy Nuriddin Xoliqnazarov
• “Boshqalar ko‘rishi, eshitishi uchun qilinadigan har qanday amal katta gunoh” — Muftiy Nuriddin Xoliqnazarov