Ijtimoiy tarmoqlarda “Navoiy kon metallurgiya kombinati”ga qarashli konda tog‘ jinslarini portlash ishlari noto‘g‘ri olib borilgani sababli odam vafot etgani haqida xabarlar tarqaldi.
Unda “NKMK”ga qarashli Uchquduq tumanida joylashgan Shimoliy kon boshqarmasidagi “Ko‘k patas” konida tog‘ jinslarini portlash ishlari noto‘g‘ri olib borilgani sababli “skvajina”da snaryad portlamay qolgani, shundan so‘ng ekskavator mashinisti avtosamosvallarga yuk ortayotganida snaryad portlab ketgani aytilgan.
“Navoiy kon metallurgiya kombinati” matbuot xizmati holatni tasdiqladi. Rasmiy ma’lumotga ko‘ra, 26-noyabr kuni taxminan soat 22:55 atrofida “NKMK” AJ Shimoliy kon boshqarmasi “Kokpatas” konida ekskavator yordamida kon massasini qazib olish jarayonida portlash sodir bo‘lgan. Portlash oqibatida ekskavator mashinisti vafot etgan.
Viloyat prokuraturasi matbuot xizmati bundan tashqari, EKG-40 rusumli ekskavator kabinasida bo‘lgan, mashinist yordamchisi T.M. bo‘yin va o‘ng qo‘l kaft sohasi 1 va 2-darajali kuyishi tan jarohati olganini ma’lum qildi.
Ayni paytda Vazirlar Mahkamasining “Ishlab chiqarishdagi baxtsiz hodisalarni va xodimlar salomatligining mehnat vazifalarini bajarish bilan bog‘liq boshqa xil zararlanishini tekshirish va hisobga olish to‘g‘risidagi nizom”ga asosan maxsus tekshirish komissiyasi tomonidan portlash sabablari va baxtsiz hodisa tafsilotlari o‘rganilmoqda.
Mazkur holat yuzasidan IIV huzuridagi 2-son IIB tergov bo‘linmasi tomonidan tergovga qadar tekshiruv harakatlari olib borilayotgan bo‘lib, sudga oid tibbiy ekspertiza tayinlangan.
Izoh (0)