Ўзбекистон мусулмонлари идораси раиси, муфтий Нуриддин Холиқназаров келажак авлод тарбиясига, таълимига жуда катта эътибор бериш кераклигини айтди.
Унинг таъкидлашича, фарзандлар тарбияси, уларнинг таълими бу бизнинг келажак мевамиз. Лекин бола ўз-ўзидан олим бўлиб қолмайди, ота-она бунга етарлича эътибор қаратиши лозим.
«Бола ўз-ўзидан олим бўлиб қолмайди, модомики, унинг орқасида ота-онаси турмаса. Имом Бухорийни вояга етказиб, уни бутун дунёга танитган — уларнинг ота-оналарининг эътибори. Отасининг ҳалол дунё топгани, онасининг унинг тарбиясига, илмига, маърифатига эътибор бергани», — дейди дейди Нуриддин домла.
Унинг сўзларига кўра, ҳозирда бутун дунё танийдиган, биз фахрланадиган энциклопедик олим Абу Райҳон Берунийнинг онаси ҳам уни ўқитиш учун елкасида ўтин ташиб, сотган экан. Боланинг илмига шу даражада эътибор берган.
«Динда Имом Бухорий, Имом Термизий, Имом Мотурудий билан, фанда Хоразмий, Беруний, Мирзо Улуғбеклар билан фахрланамиз. Энди болаларимизни мана шуларнинг илмидан ўқитиб, айни мана шу илмнинг эгаси бўлишга ҳаракат қилишимиз керак. Бу биз учун жуда муҳимдир. Мана шу йўлда, биз, ота-оналар бирлашишимиз, болаларимизнинг илм-маърифатига эътибор беришимиз керак», — дейди муфтий.
«Бугунги кунда Аллоҳнинг энг катта неъмати бўлган илм, маърифатга ўзимизни қаратайлик. Биз токайгача аждодларимизнинг номи билан фахрланамиз? Имом Бухорий авлодимиз, Термизий, Ибн-Сино, Абу Райҳон Беруний, Ал-Хоразмий, Бобур Мирзолар, Навоийлар авлодимиз деймиз, лекин фақат номи билан мақтанамиз. Ана ўшаларнинг қолдирган меросини қайта тиклайдиган авлодни етиштириб чиқариш бу бизнинг вазифамиз», — дея таъкидлаган у.
Ўзбекистон мусулмонлари идораси раиси китоб ўқилмай қўйганига ҳам тўхталиб ўтган.
«Болаларимизга совға сифатида китоб беришни одат қилайлик. Ота-оналар болаларига китоб бермай қўйди. Энг яхши совға улар учун телефон бўлиб қолди. Китоб ўқилмай қўйди. Майли, интернетдан кўрар, компьютердан кўрар, лекин ҳеч нарса китоб ўрнини босмайди. Ҳеч қачон китобдан оладиган маънавий озуқани ҳеч нарсадан оломайди. Биз болаларимизни китобга қайтаришимиз керак. Илмга, маърифатга қайтаришимиз керак.
Шу ўринда савол туғилади, ‘қандай илм ҳақида гапиряпсиз, муҳтарам домла?’, деб. Илмлар, азизлар, ҳаммаси илм. Ҳамма илм бир илм. Ҳар бир илмда мутахассисини етишиб чиқариш бизнинг вазифамиз», — деган у.
Мавзуга доир:
Изоҳ (0)