Samarqandda ayol eridan qochish uchun birovning mashinasiga yashiringani aks etgan video ijtimoiy tarmoqlarda tarqalib, keng muhokamalarga sabab bo‘lgandi. Viloyat IIB voqea tafsilotlarini e’lon qildi.
Holat aslida qanday bo‘lganiga oydinlik kiritish maqsadida o‘rganish ishlari olib borilgan. Aniqlanishicha, 25-noyabr kuni ayol erining ruxsatisiz xorijga chiqish biometrik pasportni rasmiylashtirgani sabab ular o‘rtasida kelishmovchilik yuzaga kelgan. Natijada ayol uyidan chiqib ketib, qarindoshinikida bir kecha tunab qolgan.
Eri uni qidirib, 26-noyabr kuni ko‘chada ko‘rib qolgan va mashinasiga o‘tqazib, uyiga olib ketmoqchi bo‘lganida ayoli bormasligini aytgan va ular o‘rtasida yana kelishmovchilik yuzaga kelgan.
Shundan so‘ng ayol ko‘chada o‘tib ketayotgan Cobalt’ga o‘tirib olgan va hozir eri urishini, yordam kerakligini aytib, 102 xizmatiga qo‘ng‘iroq qilishni so‘ragan. Haydovchi qo‘ng‘iroq qilgan va holat tegishli tartibda rasmiylashtirilib, taraflar hududiy IIB bo‘limiga olib kelingan.
Oila ayni paytda birga yashab kelmoqda. Ayolga himoya orderi berish taklif qilingan, lekin uni olishdan bosh tortgan.
Izoh (0)